Subling giduso sa mga mamumuo ang pag-institusyunalisa sa nasudnong minimum nga suhulan nga ₱750 kada adlaw atubangan sa nagmahal nga presyo sa batakang palaliton ug singil sa serbisyo.

Matud sa Ibon Foundation, labaw pang milayo sa kasamtangang minimum ang makabuhi nga suhulan. Sa kwentada sa grupo, kinahanglan sa usa ka pamilyang may lima ka myembro og ₱1,072 kada adlaw o ₱25,252 kada bulan aron mabuhi og disente sa Metro Manila. Kini tungod sa kahimtang nga gibutang sa estado sa “ubos” nga 3% ang tantos sa implasyon niadtong Pebrero. Dili niini langkub ang pagsaka sa mga presyo karong Marso.

Sukwahi sa pagpangulipas sa mga upisyal sa ekonomiya sa rehimeng Duterte, dili tinuod nga misaka ang mga presyo tungod kay gipatas-an ang suhulan. Pinakahinay ang pagsaka sa mga suhulan ilalum sa rehimeng Duterte ug labing ubos ang kantidad niini sa milabayang 35 ka tuig.

Niadtong Mayo 11, subling gipasaka sa Unity for Wage Increase Now! ang petisyon sa mga mamumuo alang sa dugang suhulan sa upisina sa Department of Labor and Employment. Kini human ang usa ka konsultasyon nga gisalmutan sa kapin 100 ka mamumuo sa National Cathedral sa Iglesia Filipina Independiente sa syudad sa Maynila.

Niadtong Marso 17, nagpiket ang mga mamumuo atubangan sa Kongreso samtang gidungog ang sugyot balaodnon alang sa nasudnong minimum nga suhulan.

Adlaw sa Kababayen-an

Nahimong okasyon usab ang ika-105 Pangkalibutang Adlaw sa Kababayen-an niadtong Marso 8 aron ipadayag sa kababayen-an ang ilang kasilag sa rehimeng Duterte taliwala sa padayong pagsaka sa presyo. Gipasiugdahan sa mga myembro sa Gabriela ang mga panagtapok sa kababayen-an sa Metro Manila, Baguio City, Cavite, Naga City ug Davao City aron dumdumon ang okasyon.

Gitandi ni Joms Salvador sa Gabriela ang pagkainutil ni Rodrigo Duterte sa paghunong sa sunud-sunod nga pagsaka sa presyo sa “pagpangulata sa bana nga wala mapul-i sa pagpang-abuso hangtud dili mamatay ang babaye.” Gikan sa Mendiola, gidala nila ang protesta sa Liwasang Bonifacio, sa lungsod sa Maynila.