Duha ka sibilyan ang gipatay sa mga sundalong naghuramentado human silang naambusan sa usa ka yunit sa hukbong bayan sa Himamaylan City, Negros Occidental. Gidagit ug gipatay nila ang managsuong mag-uuma nga silang Jayson ug Arnulfo Sabanal, mga residente sa Sityo Maliko-liko, Barangay Carabalan, niadtong Marso 25. Gipagawas silang mga Pulang manggugubat nga napatay sa panagsangka.

Gikordon sa mga sundalo ang 77 ka residente sa sityo ug gihulgang bombahon kung subling magka-engkwentro sa lugar. Niadtong Marso 27, gisunog sa tropa sa 94th IB ang balay ni Raffy Dayupan sa Sityo Camuag sa parehong barangay. Naigo sa mortar ang balay ni Kiko Paculanang sa Sityo Maliko-liko. Gisunog usab sa mga sundalo ang usa ka handtractor ug thresher sa mga mag-uuma sa lugar. Niadtong Marso 29, nagtaho ang mga residente sa Barangay Quintin Remo ug mga kasikbit nga barangay niini sa pagpang-redtag sa mga elemento sa 62nd IB. Niadtong Abril 1, gipatay sa militar ang mga Pulang manggugubat nga silang Elbert Quillano (Ka Carding) ug Jessa Quillano (Ka Clea) samtang anaa sa kustodiya nila sa Sityo Kulihaw, Barangay Buenavista.

Sa Negros Oriental, iligal nga giaresto sa mga elemento sa mga sundalo ug pulis ang mag-uumang si Nemfa de Lima sa Sityo Uwayan, Barangay Budlasan, Canlaon City niadtong Abril 1. Gisulayan usab nga arestuhon si Noel Montefalcon. Giransak ug gipaulanan og bala ang iyang balay sa Sityo Natoling ug gitamnan og mga pusil samtang wala siya didto.

Sa Iloilo, giaresto niadtong Marso 29 si Elmer Forro sa Barangay Lutac, Cabatuan sa PNP-Iloilo. Si Forro ang pangkinatibuk-ang kalihim sa Bayan-Panay. Gipasakahan siya og gama-gamang kaso ug gilambigit sa ambus sa BHB niadtong Abril 7, 2020 sa Lambunao.

Sa Surigao del Sur, upat ka opereytor sa chainsaw ang gipabuthan sa 75th IB sa Kabalawan, Km. 23, Anahaw Daan, Tago niadtong Marso 24. Samaron dinhi si Jomar Loyola nga nabiyaan sa lugar. Niadtong Marso 31, walay mandamyento nga giaresto si Chariz Tawide Jacinto, residente sa parehong barangay. Sa Tandag City, wala usay mandamyento nga giaresto niadtong Marso 30 si Jason Mansinatao, usa ka mag-uuma gikan sa Naw Sauhon, Barangay Maitum .

Sa Bulacan, pekeng engkwento ang palusot sa 70th IB aron itago ang paturagas nga pagpamusil sa mga sibilyan sa Sityo Osboy, Barangay San Mateo, Norzagaray niadtong Marso 30.

Sa Butuan City, gipusil sa usa ka sundalo sa 65th IB sa hita ang usa ka mag-uuma sa P16, Barangay Los Angeles niadtong Marso 27.