Boykot sang mga mamumugon sa Bicol Steel Trading. Nagtipon ang mga empleyado sang Bicol Steel Tower Trading Corporation sa Diversion Road, Naga City sang Mayo 30-31 agud kundenahon ang indi patas nga mga polisiya kag barato nga pagpanweldo sang kumpanya. Nagabaligya ang kumpanya sang salsalon nga pangkonstruksyon.

#NeverAgain sa Cebu kag Iloilo. Sang Mayo 21, nagtipon ang mga nakaluwas kag pamilya sang mga martir sang layi militar sa Redemptorist Compound sa Cebu City agud dumdumon ang mga kapintas sang diktaduryang Marcos Sr. Nagsindi man sila sang kandila kag naghalad sang pangadi para sa tanan nga biktima sang kalakasan sang estado.

Sa Iloilo City, martsa kontra-tiraniya, disimpormasyon kag pagpangtorse sa kasaysayan ang ginlunsar sang mga progresibong grupo padulong sa Iloilo Provincial Capitol. Antes sini, Mayo 20, gintukod sang National Union of Students of the Philippines-Panay ang Kabataan Against the Return of Marcos-Duterte Alliance.

Mga protesta sang pamatan-on kag mamumugon sa Laguna. Ginkasa sang Youth Defy Marcos and Duterte-Southern Tagalog ang Protesta de Mayo halin Mayo 25 tubtub Mayo 27 sa Carabao Park, University of the Philippines-Los Baños. Ini amo ang pagpamatuk sa pagpungko ni Ferdinand Marcos Jr. bilang ika-17 presidente sang pungsod.

Samtang, sang Hunyo 4, ginkasa sang mga mamumugon, rider, drayber kag sorter sang J&T Express ang ila protesta kag ginbatuan ang pagbungkag diri sang mga pulis. Nagwelga sila para pakamalauton ang pagbarato sang sweldo, iligal nga pagpahalin kag union busting, kawad-on sang benepisyo kag kaluwasan sa pagtrabaho. Ginpamatukan man nila ang iligal nga pagpahalin sa pangulo sang United Rank and File Employees sang kumpanyang J&T Express sa prubinsya.