Gidumdum sa lain-laing bahin sa nasud ug abrod ang ika-38 nga anibersaryo sa Panag-alsang EDSA pinaagi sa paglunsad og mga protesta kontra sa charter change o chacha sa rehimeng Marcos niadtong Pebrero 25.

Anaa sa 5,000 ka tawo ang nagtapok atubangan sa EDSA Shrine sa Metro Manila ilalum sa No Chacha to Network. Matud sa mga grupo, usa sa mga kadaugan sa Panag-alsang EDSA ang Konstitusyong 1987, nga nagbawal sa mga dinastiya sa pulitika, nagtakda sa mga limitasyon sa termino sa mga upisyal ug uban pang mga pagsiguro nga adunay “check and balance” sa estado. Kini kuno ang gustong usabon sa rehimeng Marcos, dungan sa pagtugot sa 100% nga pagpanag-iya sa mga langyaw sa yuta, mga yaweng imprastruktura ug pasilidad sa Pilipinas.

Nagtoo usab ang alyansa nga angayang tagdon una sa Senado ug Kongreso ang mga pangayo sa katawhan sa dugang-suhulan, pagpaubos sa mga presyo, mas maayo nga katilingbanong serbisyo ug daghan pang uban, imbes nga unahon ang chacha. Sa giusang pamahayag sa alyansa, gitawag niining “wala gikinahanglan, masiaksiakon, gasto kaayo, ug nakapukos nag-una sa pagpabilin sa pwesto sa mga anaa sa poder.”

Niining adlawa, naglunsad usab og protesta ang mga alyansang kontra chacha sa mga syudad sa Naga, Legazpi, Cebu, Bacolod, Iloilo, ug Davao. Samtang, aduna usay hiniusang protesta ug pagtuon sa Isabela, La Union, ug Sorsogon. Sa abrod, naglunsad og aktibidad ang mga Pilipino sa Los Angeles, New York, ug Boston sa US; sa Melbourne, Sydney, Perth, ug Canberra sa Australia; sa Hongkong; ug sa Canada.

Ayha ug human sa pagdumdum, walag-too nga mga protesta, panagtapok ug pagtuon ang gipahigayon sa mga grupong sakop sa alyansa.

Gawas sa No to Chacha Network, natukod usab ang lapad nga alyansa kontra chacha sa han-ay sa kabatan-onan ug kababayen-an, ingonman ang mga alyansa sa ang-ang syudad ug prubinsya.

Luyo sa malukpanong pagbabag, padayon ang pagmaniobra sa mga alipures sa rehimeng Marcos aron iduso ang chacha. Sunud-sunod ang pagdungog sa House of Representatives niadtong Pebrero 27 sa Resolution of Both Houses 7 (RBH7), ang katugbang nga balaodnon nga gisumite sa Senado nga RBH6.

Subay sa magparehong resolusyon, tulo ka probisyon lamang kuno ang usabon oras nga magtigum ang Ubos ug Taas nga Katiguman sa usa constituent assembly nga adunay magkabulag nga botohay. Kini aron hatagan og katungod ang mga langyaw nga tibuok manag-iya sa mga pangpublikong yutilidad (Artikulo XII, Seksyon 11); sektor sa edukasyon (Artikulo IX, Seksyon 4); ug sa advertising (Artikulo XVI, Seksyon 11).