Sulod sa Freeport Area of Bataan (FAB), ang pinakaunang export processing zone sa Pilipinas, nangahas sa pagsukol ang kababayen-ang mamumuo sa FCF Manufacturing Corporation, usa ka kumpanyang eksklusibong nagamugna og mga produkto alang sa global brand nga Coach ug Kate Spade.

Mipabor sila nga ikasa ang welga human nagmagahi ang kumpanya nga hangtud ₱2 lamang ang ihatag niining dugang-suhulan karong tuiga. Kini bisan sa pagpanghadlok sa maneydsment nga ibalhin sila sa trabaho, o kaha direktang tangtangon. Kapin 1,000 ang miuyon nga ikasa ang welga ug 100 ang wala miuyon sa pabrikang adunay 3,000 ka mamumuo (regular ug kontraktwal).

Nagadawat lamang og ₱500 ang mga mamumuo sa FCF, nga 44% sa ₱1,142 makabuhi nga suhulan sa Central Luzon. Gawas niini, kaylap usab ang mga paglapas sa katungod sa mamumuo sama sa forced leave, iligal nga pagpanangtang, ug dili makitawhanong kundisyon sa trabaho.

Ang pagkasa sa welga pagpakyas sa dayag nga pagpanghadlok ug pagpanumpo sa kumpanya. Sa wala pa ang botohay, sikretong gitigum sa maneydsment sa FCF ug igsuon niining kumpanya nga FPF ang mga mamumuo niadtong Pebrero 26 aron hadlukon ug ikampanya nga dili suportahan ang “strike vote.” Gibaharan niining ibalhin ang mga mamumuo ug kulangan ang benepisyo o palagputon nga walay madawat nga bayad sa serbisyo.

Ang FCF kabahin sa Fashion Focus Ltd, usa ka kumpanyang nakabase sa China. Ang mga human-daang produkto ginabaligya sa presyong ₱2,000 hangtud ₱20,000 kada usa. Niadtong 2022, mikita ang kumpanya og ₱2.8 bilyon maong imposible nga wala kini kapasidad nga maghatag og dugang-suhulan, matud sa mga mamumuo.

“Hugaw” nga mga sinina

Ang industriya sa garments o sinina sa Pilipinas, kung asa nalakip ang FCF, kabahin sa bilyong dolyar nga industriya sa kalibutan nga naga-empleyo sa 60-75 milyong mamumuo. Mokabat sa 3/4 dinhi mga babaye. Dakung bahin sa pagmanupaktura niini anaa sa atrasadong mga nasud sa Asia. Sa 2023, gibanabanang anaa sa $1.74 trilyon ang kita niini.

Sa usa ka sarbey sa grupong Clean Clothes Campaign, 93% sa mga global brand o mga tatak nga naila sa tibuok kalibutan ang wala nagahatag sa makabuhi nga suhulan sa mga mamumuo sa industriya. Matud sa panukiduki sa Oxfam International, wala pay 1% sa presyo sa mga produkto sa mga global brand ang makibhang sa ilang kita kung ipatuman nila ang makabuhi nga suhulan.

Dugang sa pagpangbarat ang sobra-sobrang pagpatrabaho (molungtad og 16 ka oras kada adlaw, pito ka adlaw kada semana); dili luwas nga mga kundisyon sa trabaho (huut, walay bentilasyon, ug sa kaso sa Bangladesh, gabok nga mga bilding); kabangis ug pagpangabuso; malukpanong paglapas sa katungod sa pag-unyon ug pakignegosasyon; pugos nga pagpatrabaho; pagpatrabaho sa mga bata ug diskriminasyon sa kababayen-an.

Sa datos sa International Labor Organization, notoryus ang mga pabrika sa sinina sa kabangis ug pagpamig-ot base sa kasarian (gender-based violence and harassment o GBVH). Sa Asia, 22.8% sa mga kababayen-ang nagatrabaho sa industriya ang nagtaho nga nakasinati sa minimum nga usa ka dagway sa GBVH niadtong 2021.