Niadtong Mayo 1, duyog nga nagmartsa sa mga mamumuo ang mga drayber ug opereytor sa dyip ilalum sa grupong Piston ug Manibela aron ipabasura ang Public Utility Vehicle Modernization Program (PUVMP) ug ang pugos nga konsolidasyon sa prangkisa. Kini ang kulminasyon sa ilang 3-ka-adlaw nga hunong pasada ug kampuhan. Duso nila nga ibalik ang 5-ka-tuig nga indibidwal nga prangkisa alang sa ilang panginabuhian.

Sa unang adlaw niadtong Abril 29, gitukod sa mga organisasyon sa mga drayber ug opereytor, kauban ang kabatan-onan ug ilang mga tigsuporta, ang mga sentro sa welga sa mga yaweng lugar sa Metro Manila ug Southern Tagalog. Gitukod nila ang kampuhan sa Liwasang Bonifacio pagkagabii.

Gikasa usab ang hunong-pasada ug mga protesta sa Baguio City, sa Calamba, Sta. Rosa, ug Cabuyao sa Laguna, sa Rizal, Legazpi City, Cebu City, Bacolod City, Iloilo City ug Davao City.

Nagsumite usab niadtong Abril 29 ang Piston og dugang petisyon sa Korte Suprema aron magpagula og temporary restraining order batok sa PUVMP. Ayha niini, nagpiket usab sila sa korte niadtong Abril 23 para iduso kining magdesisyon sa nauna nilang petisyon.

Samtang, subling nagprotesta ang mga drayber ug opereytor nga myembro sa Manibela sa Metro Manila niadtong Mayo 6.