Sadtong Mayo 1, upod nga nagmartsa sang mga mamumugon ang mga drayber kag opereytor sang dyip sa idalom sang grupo nga Piston kag Manibela para ibasura ang Public Utility Vehicle Modernization Program (PUVMP) kag kasugpon sini nga pwersahan nga konsolidasyon sang prangkisa. Ini ang kulminasyon sang ila 3-adlaw nga untat byahe kag kampuhan. Duso nila nga ibalik ang 5-tuig nga indibidwal nga prangkisa para sa ila nga palangabuhian.

Sa una nga adlaw sadtong Abril 29, gintukod sang mga kahugpungan sang mga drayber kag opereytor, upod ang pamatan-on kag ila mga tigsuporta, ang mga sentro sang welga sa mga yabi nga lugar sa Metro Manila kag Southern Tagalog. Gintukod nila ang kampuhan sa Liwasang Bonifacio sang gab-e sini.

Gintigayon man ang untat-byahe kag mga hublag sa Baguio City, sa Calamba, Sta. Rosa, kag Cabuyao sa Laguna, sa Rizal, Legazpi City, Cebu City, Bacolod City, Iloilo City kag Davao City.

Nagpasa man sadtong Abril 29 ang Piston sang dugang nga petisyon sa Korte Suprema para magpagwa sang temporary restraining order batuk sa PUVMP. Bag-o sini, nagpiket sila sa korte sadtong Abril 23 para iduso ini nga magdesisyon sa nauna nila nga petisyon.

Samtang, liwat nga nagprotesta ang mga drayber kag opereytor nga katapo sang Manibela sa Metro Manila sadtong Mayo 6.