Gisaulog sa National Democratic Front of the Philippines (NDFP) ang ika-51 nga anibersaryo niini niadtong Abril 24, uban ang mga alyadong organisasyon ug tibuok rebolusyonaryong kalihukan sa Pilipinas ug ubang nasud. Gihimo ang lain-laing tipo sa mga aktibidad aron dumdumon ang anibersaryo. Gisaulog usab niadtong Abril 17-Abril 24 ang semana sa paghandum sa mga rebolusyonaryong martir.

“Militanteng pagtimbaya ang among gitugyan sa alyadong mga organisasyon sa NDFP, ilabina sa nakigbisog nga masang Pilipino kansang ang dili mapalong nga diwa ug determinasyong kab-oton ang tinuod nga nasudnong kalingkawasan ug demokrasya nagsilbing dili mahubsang atabay sa atong rebolusyonaryong kusog,” pamahayag ni Ka Luis Jalandoni, Chief International Representative sa NDFP.

Sa mga pamahayag, gihatag usab sa mga alyadong organisasyon sa NDFP ang mainitong pagtimbaya sa anibersaryo. Gilangkuban ang NDFP sa 18 ka organisasyon. Nagpadayag usab og pakighiusa ang mga rehiyunal nga balangay sa NDFP.

Giabi-abi usab sa Partido Komunista ng Pilipinas ang NDFP ug gisulti nga atubangan sa walay-kapares nga korapsyon, pasismo ug pagpakaitoy sa rehimeng Marcos sa imperyalistang US, labing hinanali nga pakusgon ug palapdon ang NDFP ug mga alyadong organisasyon niini.

Sa Europe, naglunsad og piket, nagpintal og mga islogan ug nagtapok-tapok ang mga myembro sa Anti-Imperialist Action Ireland niadtong Abril.

Gipintal nila sa mga dingding sa pipila ka syudad sa Ireland ang “VIVA CPP-NPA-NDF” ug nagladlad og bandera sa NDFP sa ilang mga protesta ug aktibidad. Gilunsad nila ang mga aktibidad sa pakighiusa sa Wicklow, Dublin, Galway, ug Waterford sa Ireland.

Samtang, nagpilit og mural ang Friends of the Filipino People in Struggle (FFPS)-Vancouver sa Canada aron saulugon ang anibersaryo sa NDFP. Nagpagula usab og usa ka bag-ong kanta ang FFPS nga nag-uluhang “Celebrate the NDF!”