Ginsaulog sang National Democratic Front of the Philippines (NDFP) ang ika-51 nga anibersaryo sini sadtong Abril 24, upod ang mga alyado nga organisasyon kag bug-os nga rebolusyonayong kahublagan sa Pilipinas kag luwas sang pungsod. Ginlunsar ang nagkalain-lain nga porma sang mga aktibidad para dumdumon ang anibersaryo. Ginhiwat man sadtong Abril 17-Abril 24 ang semana sang pagdumdom sa mga rebolusyonaryong martir.

“Militante nga panamyaw ang ginapalab-ot namon sa alyado nga mga organisasyon sang NDFP, ilabi na sa nagahimakas nga masang Pilipino nga ang wala nagaka-ugdaw nga diwa kag determinasyon nga lab-uton ang matuod nga pungsodnon nga kahilwayan kag demokrasya ang nagserbe nga wala nagakahubas nga bubon sang aton nga rebolusyonaryong kusog,” pahayag ni Ka Luis Jalandoni, NDFP Chief International Representative.

Sa mga pahayag, ginpalab-ot naman sang mga alyadong organisasyon sang NDFP ang mainit nga panamyaw sa anibersaryo. Ginabug-os ang NDFP sang 18 ka organisasyon. Nagpahayag man sang pagpakig-isa ang pila sa mga panrehiyon nga sanga sang NDFP.

Gintamyaw man sang Partido Komunista ng Pilipinas ang NDFP kag ginhambal sa atubang sang wala tupong nga korapsyon, pasismo kag pagluhod sang rehimen Marcos sa imperyalistang US, may yara sang sobra nga kahinanali nga pabaskugon kag palaparon ang NDFP kag mga alyado nga organisasyon sini.

Sa Europe, naglunsar sang piket, nagpinta sang mga islogan kag nagtililipon ang mga katapo sang Anti-Imperialist Action Ireland sadtong Abril.

Ginpinta nila sa mga pader sa pila ka syudad sa Ireland ang mga tinaga nga “VIVA CPP-NPA-NDF” kag nagladlad sang bandera sang NDFP sa ila mga protesta kag hublag. Ginlunsar nila ang mga aktibidad sang pakig-isa sa Wicklow, Dublin, Galway, kag Waterford sa Ireland.

Samtang, nagpatapik sang isa ka mural ang Friends of the Filipino People in Struggle (FFPS)-Vancouver sa Canada para saulogon ang anibersaryo sang NDFP. Nagpagwa man sang isa ka bag-o nga kanta ang FFPS para sa anibersaryo nga gintigulohan nga “Celebrate the NDF!”