Sinagutan ti kangatuan a pammadayaw ti Communist Party of the Philippines idi Abril 22 ni Aprecia Avarez Rosete (Ka Lalay), rebolusyonaryo a dadaulo ken kadre ti CPP a namartir idi Pebrero 27 iti Barangay Malagad, Dumingag, Zamboanga del Sur. Iti panawen ti ipupusay na, ni Ka Lalay ket kagawad ti Komite Sentral ti Partido ken tumaktakder a kalihim ti pangrehiyon a komite ti Partido iti Western Mindanao.

Ni Ka Lalay ket maysa a napudno a kadre a naan-anay a nangidaton iti bagbagi na iti Partido manipud iti panagkameng na idi 1990. Nagbalin a kalihim isuna ti komite iti subrehiyon iti sidong ti Southern Mindanao Regional (SMR) Party Committee, indauluan na ti komite iti edukasyon ken nagbalin a kameng ti komiteng tagapagpaganap daytoy.

Segun iti nasayaat a rekord na iti SMR, nadutokan isuna idi 2016 kas kalihim ti Western Mindanao ken indauluan na dagiti panagsalukag tapno rimbawan ti konserbatismo a militar a manglaplapped iti panagabante ti armado a dangadang iti rehiyon. Dayta met laeng a tawen, nabotosan isuna kas kameng ti Komite Sentral idi Maikadua a Kongreso ti Partido.

Idi Pebrero 27, agbibyahe isuna a nakalugan ti motorsiklo manipud iti Dumingang tapno agpaagas iti rikriknaen na a sakit. Hinarang isuna ti 53rd IB iti dalan ken tiniliw da. Ngem imbes a bigbigen dagiti karbengan na kas balud iti gubat wenno uray kas nakadarum, layon a pinapatay isuna dagiti soldado ken pulis a makin-iggem kenkuanan. Kinabigatanna, inyanunsyo ti militar a napatay isuna iti maysa nga engkuentro iti lugar. Inparang dagiti pasista ti awanen biag a bagi na iti maysa nga “encounter site” nga inpabuya da iti midya.

Naiyanak ni Ka Lalay idi Disyembre 2, 1968 iti pamilya ti nakurapay a mannalon a Manobo iti Loreto, Agusan del Sur. Iti naganus nga edad, nakalibas isuna iti tradisyunal a pyudal ken patriyarkal nga istruktura a manglimlimita iti panagdur-as iti kababaihan. Sinerrek na ti nadumaduma a trabaho tapno suportaran ti panagadal na agingga elementarya ken nangato a pagadalan. Nagbalin nga iskolar isuna ken nag-enrol iti University of San Carlos iti Cebu City, nu sadino a nangala ti kurso iti social work.

Saan a nagbayag ket nairaman isuna kadagiti isyu iti kagimongan idi naaddaan ti naun-uneg a kaamuan iti panagsagaba ken pannakaidadanes dagiti kapada na a Lumad. Iti laksid dagiti gundaway nga agaramid ti napinpintas a biag para iti bagi na, pinili ni Ka Lalay ti biag nga agserserbi iti dadduma babaen ti panag-organisa ken panagtulong nga ikkan isuda ti bileg.