GISUGAT OG PROTESTA sa mga demokratikong organisasyon ang pag-abli sa Balikatan 39-24 niadtong Abril 22. Sa pagpanguna sa Bagong Alyansang Makabayan (Bayan), nagprotesta sila sa hedkwarters sa Armed Forces of the Philippines sa Camp Aguinaldo sa Quezon City aron pahunungon ang war games sa tropang militar sa US ug Pilipinas sa nasud.

Niadtong Abril 26, nagmartsa padulong sa embahada sa US ang mga mamumuo aron makmakon ang ginalunsad nga Balikatan war games. Kini ang ikatulo sa serye sa mga protesta nga gilunsad sa Kilusang Mayo Uno kada Biyernes niadtong Abril. Nagprotesta usab duul sa embahada sa US ang mga grupo gikan sa Southern Tagalog niadtong Mayo 5 ug mga grupo sa kababayen-an niadtong Mayo 6.

Samtang, gikundena sa Bayan-Ilocos ang paglunsad og pipila ka bahin sa Balikatan 39-24 sa rehiyon. Dili moubos sa 2,000 ka tropang militar sa Pilipinas ug US ang miadto sa Ilocos alang sa war games. Nakatakdang himuon sa La Paz sand dunes sa Barangay La Paz, Laoag City, Ilocos Norte ang live-fire exercises. Nakatakda usab nga pabusikaran ug palugdangon sa pwersa sa US ug Pilipinas ang BRP Lake Caliraya, usa ka barkong decommissioned, sa kadagatan nga atbang sa prubinsya. Hilabihang apektado dinhi ang panginabuhian sa katawhan sa rehiyon, ilabina ang mga mangingisda nga gipahunong sa pagpanagat.