Ginsugata sang protesta sang mga demokratiko nga organisasyon ang pagbukas sang Balikatan 39-24 sadtong Abril 22. Sa pagpanguna sang Bagong Alyansang Makabayan (Bayan), nagprotesta sila sa hedkwarters sang Armed Forces of the Philippines sa Camp Aguinaldo sa Quezon City para pauntaton ang war games sang tropang militar sang US kag Pilipinas sa pungsod.

Sadtong Abril 26, nagmartsa padulong embahada sang US ang mga mamumugon para tumuron ang ginapatigayon nga Balikatan war games. Ang kahublagan ang ikatatlo sa serye nga ginlunsar sang Kilusang Mayo Uno nga protesta kada Biyernes sadtong Abril. Nagprotesta man lapit sa embahada sang US ang mga grupo halin sa Southern Tagalog sadtong Mayo 5 kag mga grupo sang kababainhan sadtong Mayo 6.

Samtang, ginkundenar sang Bayan-Ilocos ang paglunsar sang pila ka bahin sang Balikatan 39-24 sa rehiyon. Indi magnubo sa 2,000 ka tropa militar sang Pilipinas kag US ang nagkadto sa Ilocos para sa war games. Natalana nga tigayunon sa La Paz sand dunes sa Barangay La Paz, Laoag City, Ilocos Norte ang live-fire exercises. Natalana man nga palukpon kag palugdangon sang pwersa sang US kag Pilipinas ang BRP Lake Caliraya, isa ka barko nga decommissioned, sa kadagatan sang atubang sang prubinsya. Lubha nga apektado sini ang palangabuhian sa rehiyon, ilabi na sang mga mangingisda nga ginpauntat sa pagpalawod.