LIBOAN KA ESTUDYANTE ug mga magtutudlo sa pipila ka mayor nga unibersidad sa US ang naglunsad og bag-ong serye sa mga protesta aron iduso ang mga administrasyon sa mga unibersidad nga iatras ang suporta ug pagpamuhunan sa Zionistang Israel. Daghang unibersidad ang hugot nga nakigtinabangay sa industriyang militar sa US, ug sa ingon, adunay tulubagon sa henosidyo sa Israel sa Gaza.

Sa mando sa gubyernong Biden, gisulod ug bangis nga gibungkag sa mga pulis ang mga protesta sa maong mga unibersidad.

Pinakatataw ang kampuhang gimuntar sa mga estudyante ug magtutudlo sa Columbia University sa New York niadtong Abril 25. Bangis nga gibungkag sa mga pulis ang kampuhan ug daghang estudyante ang giaresto ug gikasuhan.

Gawas sa Columbia, signipikante usab ang mga pagprotesta sa 18 pa ka dagkung unibersidad sa lain-laing bahin sa US gikan Abril hangtud sa kasamtangan. Gisugat usab kini sa bangis nga aksyong pulis, nga lapas sa akademikong kagawasan ug nagpeligro sa kinabuhi ug kaayuhan sa mga estudyante ug magtutudlo.

Mikaylap na sa mga unibersidad sa laing bahin sa kalibutan ang mga protesta ug kampuhan. Aduna nay susamang protesta sulod sa dagkung unibersiad sa Australia, France, Italy, Poland ug Britain. Sama sa US, ginaduso sa mga estudyante nga putlon sa mga unibersidad ang suportang pinansya sa Israel nga ilang nakita isip pagsuporta sa henosidyo sa Gaza.

Sa ulahing banabana niadtong Mayo 2, dili moubos sa 35,000 ka sibilyang Palestino na ang gipatay sa mga Zionistang pwersa sa paturagas nga pagpamomba ug pagpangatake niini sa Gaza gikan Oktubre 7, 2023. Dakung bahin kanila mga bata (14,500) ug kababayen-an (8,400).