Linibo ka estudyante kag mga manunudlo sa pila ka nagapanguna nga talatapan sa US ang naglunsar sang panibag-o nga serye sang mga protesta para iduso ang mga administrasyon sang mga unibersidad nga iatras ang suporta kag pagpamuhunan sang mga ini sa Zionista nga Israel. Madamo nga unibersidad ang hugot nga nagapakigbinuligay sa industriya militar sang US, kag sa amo may salabton sa henosidyo sang Israel sa Gaza. Sa mando sang gubyernong Biden, ginsulod kag mapintas nga gingungkag sang mga pulis ang mga protesta sa nasambit nga mga unibersidad.

Pinakatingkad ang kampuhan nga gintindog sang mga estudyante kag manunudlo sa Columbia University sa New York sadtong Abril 25. Mapintas nga ginbungkag sang mga pulis ang kampuhan kag madamo nga estudyante ang gin-aresto kag ginkasuhan.

Magluwas sa Columbia, signipikante man ang hublag sa 18 pa ka dalagko nga unibersidad sa nagkalain-lain nga bahin sang US halin Abril tubtob subong. Ginsugata man ang mga ini sang mapintas nga aksyon sang pulis, nga lapas sa kahilwayan pang-akademiko kag nagbutang sa katalagman sa kabuhi kag kaayuhan sang mga estudyante kag manunudlo.

Naglapnag na sa mga unibersidad sa nagkalain-lain nga bahin sang kalibutan ang mga protesta kag kampuhan. May yara na sang kasubong nga mga protesta sa sulod sang dalagko nga unibersidad sa Austrilia, France, Italy, Poland kag Britain. Pareho sa US, ginaduso sang mga estudyante nga utdon sang mga unibersidad ang angot sa pinansya sa Israel nga Nakita nila nga pagsuporta sa henosidyo sa Gaza.

Sa ulihi nga lista sadtong Mayo 2, indi magnubo sa 35,000 sibilyan nga Palestino na ang ginpatay sang mga Zionista nga pwersa saw ala untat nga pagpamomba kag pagpang-atake sini sa Gaza sugod Oktobre 7, 2023. Dako nga isip sa ila ang mga bata (14,500) kag kababainhan (8,400).