Sa mga komunidad sa palibot sang mga base militar sang US, ukon gintawag nga “EDCA site” kag mga ginalunsaran sang Balikatan 2024, lapnagon ang kapabayaan, disimpormasyon kag pagpang-ipit sang reaksyunaryong gubyerno kag militar sang US. Ini ang kongklusyon sang isa ka fact-finding mission nga gintigayon sang Bayan-USA kag PINAS Peace mission sa Central Luzon, Ilocos Norte kag Marawi City. Ginsapubliko nila sadtong Hunyo 12 ang resulta sang 3-semana nga imbestigasyon.

Kabahin sa mga natukiban sang delegasyon ang pagtambak sang US sang ginadudahan nga gamit-militar sa gwa sang gintalana nga mga “EDCA site” kag paghimulos sang mga suldadong Amerikano sa mga rekurso sang masang Cagayanon: pakigsabwatan sang mga pribado nga kumpanya kag militar; kawad-on sang pagpahibalo sa mga komunidad sa Ilocos kag Cagayan kung sa diin ginlunsar ang Balikatan nga nagresulta sa troma kag kahadlok sa sibilyan nga populasyon; kag militarisasyon, pagpang-ipit kag Red-tagging sa mga komunidad nga nagapangapin lang sang ila nga palangabuhian. Sa Marawi City, napaambit sang mga lokal nga upisyal ang disimpormasyon kaangot sa ginatukod nga base militar kag “economic zone” katambi sini sa “ground zero” gamit ang pondo sang EDCA.

Sandig sa delegasyon, pamahog sa kahilwayan sang mga Pilipino ang tanan nga ini, kag dapat pasabton ang rehimen Marcos, amo man ang gubyerno sang US sa idalom ni Joseph Biden sa kahalitan nga dala sini nga militarismo sa pinakaimol nga sektor.