![]( https://philippinerevolution.nu/wp-content/uploads/2024/09/20240901bi_RAA-primer-01-724x1024.png )
Gikan sa brutal nga mananakop ngadto sa nagpatoong alyado: (Primer) Nganong kinahanglang batukan ang RAA tali sa Pilipinas ug Japan?
Download here: PDF PDF (Black & White)
Gipirmahan niadtong Hulyo 8, 2024 ang dili patas nga kasabutang militar tali sa Pilipinas ug Japan nga mao ang Reciprocal Access Agreement (RAA). Nakahan-ay kini karon aron ratipikahan o aprubahan sa Senado aron mahimong hingpit nga tratado. Daghan nang senador, lakip ang presidente sa Senado nga si Francis Escudero ug nagpakaaron-ingnong “oposisyon” nga si Risa Hontiveros, ang nangagpas nga pirmahan kini. Kakoro nila ang US sa pagbaligya sa kasabutan isip instrumento para sa “seguridad ug istabilidad” sa Asia. Dayag nilang gibalewala ang kasaysayan sa brutal nga okupasyon sa Japan sa Pilipinas.
Pinaagi sa RAA, pagahatagag dalan sa rehimeng Marcos ang pagpakusog sa interbensyon sa Japan sa Pilipinas bugti sa paghatag og mga himang militar, ingonman ang mga saad sa pamuhunan ug pautang alang sa mga neoliberal nga programa ug palisiya. Labaw usab niining ginahikot ang nasud sa imperyalistang alyansa sa gubat nga gipangulohan sa US. Labaw kining magpahuyang sa kapasidad sa nasud nga independyenteng iduso ang kaugalingon niining mga interes ug pangandoy.
![](https://philippinerevolution.nu/wp-content/uploads/2024/09/Philippines-Japan-RAA-signing-July-8-2024-002.webp)
1) Unsa ang RAA?
Gihimo ang RAA aron hatagag kagawasan ang mga pwersa ug tibuok militar sa Japan nga makagawas-sulod asamang bahin sa kayutaan, kahanginan ug kadagatan sa Pilipinas. Sikreto nga gihimo ang negosasyon alang dinhi. Kabahin kini sa plano sa US ug mga alyado niini nga magdeploy sa nagkadaghang tropa sa mga nasud sa Asia, magpwesto sa ilang mga sakyanan sa dagat, maglunsad og mga pagbansay ug pagpangandam og gubat, ug mas hugot pang ihikot ang Pilipinas sa mga alyansang militar nga gipangulohan sa US.
Sa duso sa US, napinal ang kasabutan sulod lamang sa pipila ka bulan. Una kining gisulayang aprubahan panahon pa sa rehimeng US-Aquino II (2010-2016). Apan nahunong kini sa panahon sa rehimeng Duterte nga nagpakaaron-ingnong kontra-US aron makaganansya gikan sa binilyong-dolyar nga mga kontrata sa China. Usa ang RAA sa lima pa ka kasabutang militar nga gisalmutan sa Pilipinas karong tuiga. (Lantawa ang talaan.)
Sa bahin sa Japan, ang RAA ang una sa maong kasabutan nga gipirmahan niini uban sa usa ka nasud sa Asia. Kini adunay RAA usab sa Ausralia (2022) ug UK (2023).
2) Paunsa niini maapektuhan ang soberanya ug seguridad sa nasud?
Walay kalainan ang RAA sa Visiting Forces Agreement nga gipirmahan sa Pilipinas ug US sa hisgutanan sa pagyatak sa soberanya ug pagbutang sa Pilipinas sa peligro sa eksternal nga mga hulgang pangseguridad.
Sama sa VFA, dili na kinahanglang mokuha og visa ug magparehistro isip “langyawng bisita” sa mga ahensya sa estadong Pilipino ang mga nagabisitang tropa ug sibilyang kontraktor sa Japan, ingonman ang ilang mga pamilya. Ni dili rekisito ang magpresenta og pasaporte ang mga tropa kung aduna silay dalang “defense service identity card” nga pirmado sa Japan.
Walay tin-aw nga nakabutang sa kasabutan kung unsa kadugay pwedeng magpondo ang mga tropa sa Japan sa nasud. Samtang anaa sila sulod sa nasud, dili sila nakapailalum sa awtoridad sa Pilipinas ug ang Japan ang magdumala ug magkontrol sa tanan nilang aktbidad.
Pwedeng “isulod, ihan-ok ug gamiton” sa Japan ang tanang klase sa armas, amunisyon, eksplosibo ug peligrosong mga kahimanan niini sulod sa Pilipinas. Bisan adunay pagpakaaron-ingon ang kasabutan sa “pag-amping” sa mga sibilyang komunidad ug kinaiyahan, nakabutang dinhi nga walay tulubagon ang Japan sa “kadaut sa unsamang kabtangan, pagkamatay sa usa ka tropa o sa sibilyan” hangtud kini nahitabo samtang nagapatuman sa mga upisyal nga gimbuhaton (Artikulo XXIII, Numero 1, Letra A). Sa ingon, walay tulubagon ang Japan sa unsamang madaut sa mga tropa, gamit ug armas niini hangtud sakop ang kadaut sa “giusang” mga aktibidad. Sa kasabutan, mamahimong gamiton sa Japan ang tanang mga pangpublikong serbisyo, yutilidad ug pasilidad sa unsamang unilateral o giusang aktibidad (Artikulo IX).
Bisan og direkta ang lengwahe sa kasabutan kalabot sa “pagpailalum sa mga tropa sa kriminal nga hurisdiksyon” sa kinsamang sad-an, (Artikulo XXI, Numbero 2, Letra B), magpatigbabaw pa gihapon ang “katungod sa ekslusibong hurisdiksyon” sa Japan sa mga tropa niini kung ang mga krimen “dili langkub” sa balaod sa Pilipinas o kung ang krimen batok lamang sa kabtangan o seguridad sa Japan (Artikulo XXI, Numero 3, Letra A). Ingonman, mamahimong “magdesisyon” ang Pilipinas nga dili ipailalum sa hurisdiksyon niini ang kinsamang tropang Japanese nga gipasakaan og kasong kriminal, o kaha maghatag og “kunsiderasyon” (sympathetic consideration) sa hangyo sa Japan nga isurender (waive) ang hurisdiksyon niini sa ingon nga mga kaso (Artikulo XXI, Numero 4, Letra C ug D).
Ang maong mga probisyon pareho kaayo sa mga probisyon sa US-RP Visiting Forces Agreement nga gigamit aron makalusot ang pipila ka tropang Amerikano nga nakahimo og krimen sa Pilipinas, pananglitan si US Marine Lance Cpl. Joseph Scott Pemberton nga mipatay sa transgender nga si Jennifer Laude niadtong 2014 ug Marine Lance Cpl. Daniel Smith nga milugos sa Pilipinang si “Nicole” niadtong 2006. Sama sa VFA ug uban pang dili patas nga kasabutang militar sa Pilipinas ug US, pagadamayon sa RAA ang nasud sa mga gubat sa Japan tungod sa presensya sa mga tropa ug gamit militar niini sa nasud.
![](https://philippinerevolution.nu/wp-content/uploads/2024/09/ZZZ_101118_mmanila_b_2018_10_11_15_28_56.jpg)
3) Nganong ginaduso sa US ang RAA?
Sakop ang RAA sa Indo-Pacific Strategy sa US nga adunay nag-unang tumong nga pugngan ang paglapad sa kusog ug impluwensya sa China, ang komun nilang karibal sa Asia. Gipirmahan kini sa konteksto sa gipasubsub nga mga operasyong militar sa Japan sa ubang nasud sulod sa Quad (Quadrilateral Security Dialogue) nga gipangulohan sa US, ug sa nagkadakung papel niini sa mga pagbansay ug pagpangandam sa gubat.
![](https://philippinerevolution.nu/wp-content/uploads/2024/09/Map-QUAD-bw.png)
Sa pagpanghulhog sa US sa nangaging mga tuig, gipakusog ug gipalapad sa Japan ang ginatawag niining self-defense force isip usa ka pwersang panggubat, butang nga gibawal sa kaugalingon niining konstitusyon. Ginaduso sa US ang Japan nga patas-an ang badyet niini sa militar ngadto sa 2% (gikan sa 1%) sa gross domestic product niini aron “matampo sa gasto” sa “pagpakgang sa agresyon sa China.”
Ginagamit sa US ang Japan isip nag-unang braso niini aron ipahamtang ang imperyalistang hegemonya sa Asia. Nahimutang dinhi ang dili moubos sa 15 ka lapad nga base militar nga may 55,000 tropang Amerikano. Nakaistasyon sa Japan ang 7th Fleet, ang pinakadakung forward-deployed fleet sa US Navy. Kasamtangan kining gilangkuban sa tulo ka aircraft carrier (gikan sa isa), 4-5 cruiser, 18-19 destroyer, 8 amphibious ship, 5 submarino, 9-11 logistics ship ug kapin 500 ka lain-laing tipo sa sakyanang pangkahanginan.
Sa unang higayon niadtong 2022, giimbita sa US ang Japan sa katiguman sa North Atlantic Treaty Organization, kung asa natibuok niini ang pipila ka baylateral nga kasabutan sa merkado sa armas ug giusang mga pagbansay. Niining 2024, gipatawag sa US ang duha ka magkabulag nga “trilateral nga tigum” aron hatagan og mas dakung papel ang Japan sa interbensyon niini sa South Korea ug Pilipinas.
4) Unsa ang bentahe sa Japan sa RAA?
Samtang nagsilbi ang Japan isip sekundaryong kaabag nga imperyalistang gahum sa US, adunay kalkuladong risgo usab ang US nga mapakusog niini ang kabubut-on sa mga monopolyong kapitalistang Japanese sa ekspansyunismong pangandoy.
Niadtong 2022, gitibuok sa Japan ang National Security Plan kung asa nahisulod ang programang Official Security Assistance (OSA). Sama sa Official Development Assistance (ODA) niini, agianan ang OSA sa sarplas nga kapital ug gamit-militar sa Japan padulong sa ubang nasud sa Asia. Ang OSA mao ang mga pautang aron ipangpalit sa nangutang nga nasud sa mga makina, sakyanan, klase-klaseng produkto ug skills gikan Japan. Sa misunod tuig, gigambalay usab sa Japan ang kaugalingong planong Free and Open Indo-Pacific aron hatagag hulagaway ang pagpakusog sa kaugalingong presensyang militar ug pagpalapad sa impluwensya sa Asia isip imperyalistang nasud.
Ilalum sa programang OSA, target sa Japan nga himuong han-okan sa kapital ug gamit-militar ang Pilipinas, Vietnam ug Singapore. Usa sa mga unang kontrata niini ang pautang sa Pilipinas aron ipangpalit sa lima niining barkong pangpatrolya. Kini nga mga barko pagagamiton sa Philippine Coast Guard para “magpatrolya” sa kadagatan uban ang mga pwersang Amerikano, Japanese ug Australian.
Gawas sa OSA, laraw sa Japan nga maghan-ok og hangtud $75 bilyong sarplas nga kapital niini sa dagway sa pamuhunan sa lain-laing proyektong imprastruktura sa mga nasud sa South ug Southeast Asia. Labaw sa US ug China, ang Japan ang pinakadakung imperyalistang tigpamuhunan sa South ug Southeast Asia. Mikabat og $367 bilyon ang kasamtangang pamuhunan niini sa mga proyekto sa Southeast Asia pa lang.
Ang Japan ang numero unong kaabag sa Pilipinas sa pamatigayon niadtong 2023 ug pinakadakung tinubdan sa langyawng pamuhunan sa nasud sa nangaging mga tuig. Giatiman sa Japan ang mga komersyal nga interes niini sa nasud pinaagi sa dili patas nga Japan-Philippines Economic Partnership Agreement (JPEPA). Gihatagag kagawasan sa maong kasabutan ang pagpahimulos sa Japan sa mga rekurso ug baratong kusog-pamuo sa mga Pilipino, samtang ginaobliga ang Pilipinas nga paubsan ang mga taripa sa mga produktong Japanese ug tangtangon ang nahabiling mga proteksyon sa lokal nga industriya ug agrikultura.
Nakagahin ang kapital sa Japan (sa porma sa mga pautang) sa engrandeng mga proyektong imprastruktura, nag-una sa mga riles ug kalsada, na nagpalayas sa liboan nang mga komunidad, miguba sa panginabuhian sa liboang kabus ug migun-ub sa kinaiyahan. Kini usab ang nagpagrabe sa sistema sa transportasyon nga tungod sa pagduso niini sa mini nga modernisasyon nga nagpalagpot sa mga tradisyunal nga dyip sa kalsada. Nalambigit kini sa makawkawong mga proyekto alang sa renewable energy, samtang numero unong tigpamuhunan sa mga plantang karbon ug LNG nga makadaut sa kinaiyahan ug nagapagrabe sa climate change.
5) Nganong pagluib sa Pilipinas ang pagsulod sa rehimeng Marcos sa RAA?
Sa kinaunhang higayon human ang Ikaduhang Gubat Pangkalibutan, pagatugutan sa RAA ang pagsulod ug pagpondo sa mga tropa sa imperyalistang Japan sa nasud. Sa tunga-tunga sa 1942 ug 1945, kung asa brutal nga giokupa sa Japan ang Pilipinas, gihimo sa mga tropa niini ang dinaghang pagpatay, tortyur ug pagpanglugos. Sa banabana sa mga eksperto sa kasaysayan, 90,000-300,000 nga mga Pilipinong sibilyan ang gipatay sa mga tropang Japanese niining panahuna. Usa sa pinakalinuog mao ang Battle of Manila gikan Pebrero hangtud Marso 1945, kung asa gatusan ka libo ang gipatay ug gatusan ang gilugos sa mga tropang Japanese.
Usa sa mga wala pa nag-ayo nga samad nga resulta sa brutal nga okupasyon ang kawalay hustisya sa mga biktima sa sekswal nga pagpangulipon sa pwersang Japanese. Liboan ka kababayen-an, bata ug bayot nga Pilipino ang gidagit gikan sa ilang mga komunidad ug gipriso sa mga kampo militar aron subli-subli nga luguson, tortyuron, ug pakaulawan. Giila ang mga biktima isip mga “comfort women.” Luyo sa duso sa United Nations, wala kanus-ama hingpit nga giila sa Japan ang mga Pilipinong comfort women ug wala silay gihatag nga kumpensasyon ni sentimo.
Atubangan sa nagkagrabeng interbensyon sa US ug Japan sa Pilipinas, ug pagdamay niini sa ginaduso nga imperyalistang gubat batok sa China, hugot nga ginabatukan sa katawhang Pilipino ang salikwaot nga RAA. Gikundena nila ang rehimeng Marcos ug mga kakunsabo niini sa Senado sa pagluib sa katawhang Pilipino.
Atol sa pagpirma sa kasabutan, dihadiha nga nagpadayag og pagsupak ang mga grupong nasudnon-demokratiko. Miadto sila sa embahada sa Japan aron ipadangat ang ilang reklamo. Lakip sa mga nagpaabot sa hugot nga pagsupak ang Lila Pilipina, usa ka organisasyon sa mga comfort women nga gitukod niadtong 1994. Pipila na lamang ang nahabilin kanila sa kasamtangan.
![](https://philippinerevolution.nu/wp-content/uploads/2024/09/comfort-women.webp)
Dugay nang ginaduso sa mga grupo ug mga progresibong kongresista ang paglakip sa topiko mahitungod sa comfort women sa edukasyon aron dili malubong sa limot ang brutalidad sa pagpanakop sa Japan. Hangtud karon, wala kini gihatagag importansya sa reaksyunaryong estado, ug hinunua, pugos pang ginalubong sa limot.
![](https://philippinerevolution.nu/wp-content/uploads/2024/09/20240708.bayan-protest-japanese-embassy.jpg)
Babagan ang Japan-Philippines Reciprocal Access Agreement!
Batukan ang mga probokasyon sa gubat ng US!
____
Giandam ng:
Kawanihan sa Impormasyon
Partido Komunista ng Pilipinas
Setyembre 2024