Magkasabay na ipinagdiwang ng mga rebolusyonaryong siyentista’t inhinyero ang ika-49 anibersrayo ng Liga ng Agham para sa Bayan (LAB) at ika-56 anibersaryo ng Partido Komunista ng Pilipinas noong Disyembre 2024. Sa ulat ng pahagayan ng LAB na Agham Bayan ngayong Enero, nagtipon ang mga kasapi nila sa isang sikretong lokasyon sa National Capital Region para sa isang pagdiriwang.

Nagkaroon ng isang simpleng handaan ang LAB sa kanilang pagtitipon. Binalikan nila at ipinagdiwang ang iba’t ibang mga tagumpay na nakamit ng mga balangay nito at naranasang pagsubok sa taong 2024, laluna sa panahon ng unang taon ng kilusang pagwawasto.

“Naging tampok ang mga tagumpay sa mga kampanya, sa muling pagsibol ng pag-oorganisa sa hanay ng batayang masa, at sa pagpapaunlad ng suporta para sa Bagong Hukbong Bayan (BHB),” ayon sa pahayagan. Sa kabila nito, ipinahayag ng LAB na malaki pa ang kailangan nitong pangibabawan kabilang ang konserbatismo sa pagrerekrut ng bagong mga kasapi.

Ayon sa editoryal ng Agham Bayan, “dapat malinaw sa atin, bilang mga rebolusyonaryo, na ang pangunahing layunin natin sa paglulunsad ng kampanya ay ang pagtugon sa interes ng masa at pagpaparami at pagpapalakas ng ating rebolusyonaryong pwersa.” Ngayong 2025, isinaad ng LAB na tuluy-tuloy nitong itataguyod ang mga tungkulin para makatulong sa pagsusulong at pagpapalakas ng rebolusyong Pilipino.

Pinarangalan din LAB ang lahat ng mga rebolusyonaryong martir mula sa sektor ng agham at teknolohiya na nag-alay ng kanilang buhay para sa bayan at sa rebolusyon. “Tumatayong inspirasyon para sa siyentista’t inhinyero sa Pilipinas ang mga buhay nila Aloysius Baes, Engr. Mon Ramirez, JM “Ka Simon” Ayuste, at marami pang iba,” ayon sa editoryal.

Dagdag pa ng LAB, ipinakita nito sa kanila na posibleng gampanan ng isang siyentista ang rebolusyonaryong tungkulin na isulong ang pambansa-demokratikong rebolusyon na may sosyalistang perspektiba, sa mga laboratoryo at silid-aralan ng kalunsuran hanggang sa armadong pakikibaka sa kanayunan.

“Itutuluy-tuloy ng mga rebolusyonaryong siyentista, inhinyero, propesyunal, at estudyante ang kilusang pagwawasto para makamit ang ibayong tagumpay,” anito. Maghahanda rin ang LAB para sa ginintuang anibersaryo nito sa Disyembre.

Sa programa ng pagdidiriwang, nagpakitang-gilas din ang mga kinatawan ng LAB sa kanilang mga inihandang kultural na pagtatanghal. Upisyal nilang isinara ang pagtitipon sa sabayang pag-awit ng Internationale na pinamunuan ng LAB Chorale.