Nagkasa ng welga ang mga manggagawa ng Handyman-True Value-Pet Lovers Empowered Workers Union (HANEP) noong Enero 6 sa pangunahing depot ng Handyman sa Manila Bay Spinning Mills Compound sa Marikina City. Natulak silang lumipat at itayo ang piket sa hedkwarters ng Robinsons Retail Holdings Inc. (RRHI), may-ari ng Handyman, sa Barangay Libis, Quezon City dahil sa iligal na pagbuwag sa kanilang welga.

Ang welga ay tugon ng unyon sa iligal na tanggalan sa hindi bababa sa 122 manggagawa ng Handyman-Robinsons noong Nobyembre 2024. Umaabot sa 4 hanggang 22 taon nang nagtatrabaho ang mga manggagawang tinanggal. Tinanggal sila ng RRHI dahil sa pagtataguyod sa kanilang unyon.

Nagmula ang panggigipit at union busting ng RRHI noong Mayo 2024 nang magdesisyon ang labor arbiter, sa pagtutulak ng unyon, na ang mga myembro ng HANEP ay mga regular na manggagawa ng kumpanya. Tutol dito ang kapitalista at iginigiit na sila ay mga manggagawang kontraktwal dahil diumano’y ineempleyo sila ng manpower agency.

Kaugnay nito, nag-apela ang RHHI sa National Labor Relations Commission (NLRC) laban sa desisyon at itinulak rin ang pagkansela sa rehistro ng unyon. Noong Nobyembre 2024 ay binaligtad ng NLRC ang desisyon ng labor arbiter kaugnay ng pagiging regular ng mga manggagawa na ginamit na dahilan ng RHHI para sisantehin ang 122 manggagawa.

Kasabay ng pagsasampa ng unyon ng motion for reconsideration, nagsampa rin ito ng “Notice of Strike” dahil sa “unfair labor practice” sa anyo ng pagbuwag sa unyon. Samantala, ibinasura ng NLRC ang petisyon ng RHHI na ipakansela ang rehistro ng unyon noong Disyembre 2024.

Sa kasalukuyan, mag-iisang linggo nang nakatirik ang welga at piket ng mga manggagawa. Inaasahan ng mga manggagawa na haharapin muli sila ng ahensya at maneydsment ng Robinsons sa Enero 14 para pag-usapan ang kanilang mga kahingian.

Nagpaabot na ng suporta at pakikiisa sa unyon ang iba’t ibang grupo ng mga manggagawa at kabataan kabilang ang Anakbayan. “Nakikiisa ang Anakbayan sa lahat ng manggagawang Pilipino para sa kanilang laban para sa regular na trabaho at nakabubuhay na sahod,” ayon sa grupo.

Ang RRHI ay pag-aari ng burgesyang kumprador na pamilyang Gokongwei ($3.2 billion net worth noong 2024). Ang mga Gokongwei ay kabilang sa mga kroni ng pamilyang Marcos at kasalukuyang nagsisilbing Special Assistant to the President for Investment and Economic Affairs ni Marcos Jr si Frederick Go, parte ng pamilya.

Ang HANEP ay isang lokal na unyon sa ilalim ng Solidarity of Unions in the Philippines for Empowerment and Reforms (SUPER). Isa ito sa dalawang pederasyon ng manggagawa sa ilalim ng Bukluran ng Manggagawang Pilipino (BMP), grupong binuo ng dating mga lider na bumaklas sa Kilusang Mayo Uno (KMU) noong 1993.