Magkakasunod ang pahayag ni Ferdinand Marcos Jr at kanyang mga upisyal sa Philippine National Police (PNP) na nagbabantay at naghahanda sila para sa posibleng pagsabog ng karahasan sa mga protestang bayan kontra kurakot sa darating na Nobyembre 30. Pinalulutang ni Marcos na tiyak siyang mayroong mga “instigador” na dapat bantayan at batid ng kanyang gubyerno kung sino ang mga ito.

Ipinahayag pa ni Marcos na wala siyang nakikitang lohika sa pagdadala at paggamit ng molotov cocktails sa mga kilos protesta liban sa layuning panggugulo. Tusong nagpanggap si Marcos na hindi siya tutol sa isasagawang mga rali ngunit babantayan ang mga “instigador.”

Ganito rin ang pahayag ni Acting PNP Chief Lt. Gen. Jose Melencio Nartatez Jr. Aniya, naghahanda ang mga pulis para sa “karahasan” at ngayon pa lamang ay iniipon na nila ang datos kung ilan ang lalahok sa rali, sinu-sino ang mga magrarali at sinong mga grupo ang “banta” na dapat bantayan at paghandaan.

Pinuna ng Bagong Alyansang Makabayan (Bayan) ang mga pahayag na ito ni Marcos at kanyang mga pulis. Ayon sa grupo, ginagamit ng rehimen ang banta ng karahasan para ilihis ang atensyon ng bayan mula sa tunay na isyu at ugat ng mga protesta: ang malawakang katiwalian sa gubyerno, cover-up sa mga krimen at kawalang pananagutan.

“Inililihis nito ang atensyon…tungo sa kung paano dapat isagawa ang mga protestang kontra korapsyon,” pahayag ng Bayan. Anang grupo, dapat itigil na ni Marcos ang pagdidikta sa mamamayan kung paano nila ipapahayag ang kanilang galit sa nagpapatuloy na malawakang korapsyon ng kanyang rehimen.

Sa katunaya, ayon sa grupo, ang tunay na karahasan ay nagmumula sa rehimeng Marcos na layuning supilin ang paglaban ng bayan at gamitigin ang mga batas at regulasyon para i-target ang mga kritiko at aktibidad. Ganito ang sinapit ng mga lumahok sa pagkilos noong Setyembre 21 sa Luneta at Mendiola sa Maynila.

Hindi bababa sa 270 ang inaresto at ikinulong ng Manila Police District, kabilang ang 90 menor de edad, sa mga protesta. Dumanas sila ng kalupitan at tortyur sa kamay ng mga pulis. Isa ang namatay sa pamamaril ng PNP.

Liban dito, mayroong apat na lider-estudyante ang pinadalhan ng subpoena ng PNP-CIDG para sa “imbestigasyon.” Samantala, noong Nobyembre 3 ay nag-anunsyo ang PNP-Criminal Investigation and Detection Group (PNP-CIDG) na nagsampa ito ng mga kaso sa Department of Justice laban sa 97 hindi pinangalanang indibidwal kaugnay ng salpukan at protesta. Ang mga kaso ay para sa konspirasiya o panukalang maglunsad ng rebelyon o insureksyon, sedisyon at pag-uudyok ng sedisyon.

Tulad noong Setyembre 21, nag-anunsyo na ang National Capital Region Police Office (NCRPO) na magpapakat ito ng 15,000 mga pulis laban sa protestang bayan sa Nobyembre 30. Inaasahang lalaki pa ito kung magpapadala ng karagdagang mga pwersa ang mga yunit ng pulis mula sa Region III, Region IV-A at iba pang kalapit na rehiyon.

“Ang labis-labis na pagpapakat ng mga pulis ay sumasalamin sa paranoia ng gubyerno at intensyong pigilan ang mga magpuprotesta at sagkaan ang karapatan ng bayan na malayang magpahayag,” ayon sa Bayan.

Sa harap ng mga banta at pasismo ng rehimeng Marcos, nanawagan ang Bayan ng mas malalaki at mas matapang na mga protesta sa Nobyembre 30 at sa susunod pang mga pagkakataon. “[Bitbitin] natin ang panawagang kamtin ang pananagutan at ang pakikibaka para baklasin ang burukratang kapitalismo sa lipunan,” pahayag ng Bayan.

Ang Bayan ay isa sa mga organisasyong bahagi ng network na Kilusang Bayan Kontra Kurakot (KBKK) na ibinunga ng dambuhalang protestang bayan sa Luneta noong Setyembre 21. Pangungunahan ng KBKK ang pambansang protestang bayan kontra kurakot sa Nobyembre 30.