Madinalag-on nga natigayon sa isa ka yunit sang Pulang hukbo idalom sa Mount Cansermon Command- New People’s Army (MCC-NPA) ang pagparalisa sa duha ka backhoe nga ginpanag-iyahan sang ESJ construction firm sang mga Javelosa upod sa mga Gensulin, sadtong Hunyo 14, pasado alas-10:00 sang gab-i sa Sityo Bulod, Brgy. Carabalan, Himamaylan City, Negros Occidental.

Ginpahamtang ang ini nga sanction sa amo nga kumpanya bangud sa makapila ka beses sini nga wala pagrespeto sa rebolusyonaryong hublag. Wala ini ginsunod ang mga patakaran sa rebolusyonaryong pagbuwis nga ginpahamtang sa mga erya nga sakop sa mga yunit sang NPA . Dugang ini, madamo man sang reklamo ang nabaton sa mga yunit sang NPA sa kondisyon sa pagtrabaho halin sa pumuluyo ilabi na ang indi makatarunganon kag manubo nga sweldo.

Ini nga kumpanya ang ginpahamtangan man sang sanction sang nanligad 2021 bulan sang Septyembre bangud sa pareha nga rason. Ginhatagan ini sang kahigayon sang rebolusoyonarong hublag pero napaslawan ini sang pag-comply sa iya obligasyon sini labi na nga naga-operate ini sa sakop sang erya sang NPA.

Proyekto ini sang Barangay Dev’t. Program (BDP) nga ang tinutuyo amu ang pagdebelopar sang mga dalan sa mga interyor nga lugar sa kabukiran sang Himamaylan City pakadto sa katambi sini nga banwa sang Tayasan, Negros Oriental. Ang ini nga proyekto magahatag dalan sang pagsulod sang mga dalagko nga kumpanya sang mina nga plano maga-opereyt sa mga bukid sang Cansermon, Tahod-Ilahas, Cambantog kag mga katambi sini. Mangin biktima sang malaparan nga pagpang-agaw sang duta ang mga tumandok kag tribu sang Ituman-Maghat- Bukidnon. Magluwas sini, magasulod man ang lain pa nga mga proyekto nga magahulga sang pangabuhian kag duta sang pumuluyo kaangay sang eko-torismo nga klaro indi makahatag sang substansyal nga kaayuhan sa pangabuhian sang mga mangunguma kag tumandok.

Sa pihak bahin, lubos nga ginkundenar sang MCC-NPA ang makasiligni nga pagmasaker sang pamilya Fausto sa Sityo Cangkiling, Brgy. Buenavista, Himamaylan City sa kadungan man sini nga petsa. Ginapakamalaot sang MCC-NPA ang mga pagpalapta sang AFP-PNP/NTF-ELCAC nga mga NPA ang naghimo sang amo nga insidente. Ginatabunan lang sini ang ila kahuy-anan sa pihak sang ila masingki nga pokus nga operasyon militar sa mga kabukiran sa sakop sang Himamaylan City kag sa ila mga deklarasyon nga wala ukon huyang na ang NPA sa amo nga mga lugar. Apang madamo sang aksyon militar ang natigayon sang MCC-NPA sa mga lugar nga ara man mismo sa ila ugsaran. Bisan ano nga pagpangtabon, pagpamahid kag pagpanglapta sang peke nga balita kag impormasyon, athag nga wala gid nagakahubas ang suporta sang pumuluyo sa ila matuod nga hangaway nga amo ang NPA. Indi matigayon ang mga madinalag-on nga aksyon militar kon wala ang hugot nga suporta sang masa.###