Padayon ang pagsabwag sa kakugmat sang 94th IB upod ang mga traydor sa pumuluyo nga surrenderees sang lima ka beses nga nagpalupok gamit ang M203 grenade launcher sa Sityo Cantupa-Pisok, Brgy. Buenavista, Himamaylan City sadtong Agosto 17s, duha ka beses sa aga kag tatlo ka beses sa hapon. Nagtuga ini sang grabe nga kahadlok sa pamilya Martinez kag Mariano, lakip na ang 11 ka menor de edad.

Ginransak sang mga suldado kag ila mga idu-ido ang balay sa pamilya Martinez. Nagtuga sang grabe nga troma sa apat ka kabataan nga mga menor de edad (2-16 anyos) sang ginpapanaug sila sa ila balay kag ang duha ka mag-iloy nga Martinez gin-imbestigar kag pilit man nga ginapasugid kon diin ang mga NPA.

Naglawig sang pila ka oras ang pagtiner sang mga suldado sa 94th IB kag, sa ulihi, ginpahug pa ang pamilya Martinez nga balikan sila liwat kon manugid sa ginhimo sang nasambit nga militar.

Samtang, naghilibion ang pito ka mga kabataan (upod ang isa ka tuig nga lapsag) sa pamilya Mariano sang nagasinggitan ang mga suldado samtang nagapalupok. Nasugata sang mga 94th IB ang pamilya Mariano upod ang ila kabataan nga nagatabok sa suba pakadto sa pihak nga sityo. Ginpisa-pisa sang pag-imbestigar ang bilog nga pamilya kag malawig pa antes sila ginbuhian bisan basa na sila bangud sa mabaskog nga ulan.

Ginapakamalaut sang Mt. Cansermon Command-New People’s Army (MCC-NPA) ang ginhimo sang 94th IB nga pagpang-atake sa mga mangunguma sa nabukid nga bahin sang Himamaylan City.

Base sa natipon nga report naglab-ot sa 12 ka kaso sang pagpanglapas sang tawhanon nga kinamatarung ang ginkomiter sang 94th IB halin Hulyo 25 tubtob Agosto 17, ukon sulod lang sa tatlo ka semana. Duha sini ang iligal nga pagpangdakop kag pagpasaka sang pato-pato nga kaso, duha ka insidente sang pagpangastigo diin anum ka mangunguma ang biktima, apat ka beses nga pagpamahug kag pagpangharas, isa ka kaso sang pagpangransak, isa ka kaso sang iligal nga pagdetine, kag duha ka kaso sang patarasak nga pagpalupok nga gindetalye sa ibabaw.

Ginahangkat sang MCC-NPA ang local government unit sang Himamaylan City nga hatagan sang aksyon ang mga pagpanglapas sang 94th IB batok sa inosenteng sibilyan. Ginapanawagan man ang mga taong-simbahan, human rights advocates kag mga peace-loving people nga magbulig sa mga biktima agud mabatian ang ila tingog nga nagasinggitan sang hustisya kag pagpahalin sa mga militar sa ila komunidad. ###