Nagresulta sa pagkapatay sang duha ka tropa sang 62nd IB sa madinalag-on nga operasyon haras sang isa ka yunit sang Leonardo Panaligan Command-New People’s Army (LPC-NPA) batok sa naga-operasyon nga tropa sang berdugong 62nd IB sa Sityo Pinangimnan, Barangay Budlasan, Canlaon City, Negros Oriental, sadtong Nobyembre 21, alas 10:00 sang aga.

Gikan katapusan semana pa sang Septyembre nga nag-operasyon ang tropa militar sa lugar sa paglagas sa NPA. Nobyembre 20 sang gab-i, ang 16 ka tropa sang 62nd IB ang naglusob sa lugar kag nagbahin ini sa tatlo ka kolum. Sekreto nga nagposisyon ang nasambit nga militar sa mga siot nga bahin malapit sa balay sang mga sibilyan.

Pagkaugma, alas 10:00 sang aga, Nobyembre 21, samtang nagapanguma sa lugar ang sibilyan nga si Rene Nelles, 26 anyos, may asawa kag kabataan sang Sityo Columbia, Barangay Trinidad, Guihulngan City, Negros Oriental, gulpi lang ini nga gin-istraping sang lima ka nerbyusong tropa militar. Luwas nga nakapalagyo ang biktima kag nakapalayo sa nagapaarak nga militar.

Lipod sa militar, may yunit sang NPA sa lugar nga nagatungod sang hilikuton masa, combat-ready kag handa nga nagpangapin sa masa batok sa kalakasan nga ginahimo sang pasistang 62nd IB. Pagkabati sang mga Pulang hangaway sang linupok, gilayon sila nga nagmaniobra kag ginharas ang lima ka tropa sang pasistang tropa. Hilway naman nga naka-atras ang NPA.

Nagpakita ini nga pirme handa ang NPA sa pagpangapin sa masa batok sa pasismo sang estado paagi sa ila idu-ido nga AFP, PNP, NTF-Elcac kag paramilitar. “Wala bisan anu ang masa kun wala sang NPA.”

Nagadayaw ang LPC-NPA sa kaisog, determinado kag responsable nga ginpangapinan sang mga Pulang hangaway ang masa sa pihak sang pagpanghalit, kalakasan kag kapintas sang militar sa baseng masa.

Ginapanawagan sa tanan nga pumuluyo sa Central Negros nga ipadayon ang hugot nga paghiliusa kag padayon nga maghimakas. Magpasakop sa NPA kag isulong ang inaway banwa tubtob sa kadalag-an.