Patay ang duha ka sundalo sang 94th IB sang gin-reyd sa masobra 30 ka bilog nga tropa sang nasambit nga militar ang isa ka yunit sang Mt. Cansermon Commmand-New People’s Army (MCC-NPA) nga nagapahulay sa isa ka balay sa Sityo Pangi, Brgy. Carabalan, Himamaylan City, Negros Occidental sadtong Hulyo 7, pasado alas 7:00 sang aga. Una nga ginpalupkan sang mga Pulang hangaway ang isa ka tim sang militar sang nagapadulhog ini pakadto sa balay nga ila ginapahulayan.

Samtang nagmaniobra sa paborable nga tereyn ang mga Pulang hangaway, naigo si Potenciano Sevilla (Ka Bambam) nga amo ang gintunaan sa iya kamatayon. Naglawig sang masobra 15 minutos ang baylohanay sang lupok.

Ginahatag sang MCC-NPA kag sang bilog rebolusyonaryo nga pwersa ang Pulang pagsaludo kay Ka Bambam nga nagpakita sang kaisog kag determinasyon sa pag-atubang sa kaaway. Mangin inspirasyon ang iya kabuhi nga ginhalad para sa rebolusyon kag dugang ini nga abono sa matambok nga duta para sa padayon nga pagsulong sang armadong paghimakas.

Ginapanginwala man sang MCC-NPA ang ginatikal sang Armed Forces of the Philippines (AFP) nga may narekober sila nga armas luthang matapos sa natabo nga engkwentro.

Mabuhay si Ka Bambam kag ang tanan nga rebolusyonaryo nga martir!

Mabuhay ang pungsodnon demokratiko nga rebolusyon!