Tulo ka mga sakop sa 62nd IB ang patay sa kontra-opensiba sa mga Pulang manggugubat ilalom sa Leonardo Panaligan Command-New People’s Army (LPC-NPA) niadtong Oktobre 28, pasado alas 8:00 sa buntag, sa Sityo Inangaw, Barangay Quintin Remo, Moises Padilla, Negros Occidental.

Walay kahadlok nga gi-atubang sa mga Pulang manggugubat ug nailog ang inisyatiba sa dihang una silang nakapabuto batok sa nasambit nga militar.

Sa desperasyon sa 62nd IB sa ilang palpak nga paninguha sa pagpukan sa NPA ug sa nahiaguman nilang tulo ka kaswalti, nagpaturagas ang mga berdugong sundalo sa pagpamusil ug gipang-istraping ang mga kabalayan. Nagresulta kini sa pagkamatay sa usa ka unom ka tuig nga bata sa pamilyang Gelacio.

Dili matuod ang gipangyawyaw sa militar nga ang bala sa mga Pulang hangaway ang nakaigo sa maong bata. Hugot nga gihuptan sa NPA ang pagtamod sa Comprehensive Agreement on Respect for Human Rights and International Humanitarian Law (CARHRIHL) ug sa internasyunal nga makitawhanon nga laye.

Ingonman, ang nahitabo sa Sityo Inangaw usa ka tamparos sa mga pasistang Armed Forces of the Philippines (AFP) nga nagsige og panghambog nga wala nay aktibong larangang gerilya sa isla. Bisan unsaon dili mapukan ang armadong kalihukan. Sama sa atabay, magpadayon kining magtubod, magdaghan ug magalig-on samtang nakig- away.