Lubos nga ginapanginbulahan sang Leonardo Panaligan Command-New People’s Army (LPC-NPA) sa isa ka yunit sang NPA nga nagpatigayon sang madinalag-on nga kontra-opensiba batok sa nagahara-hara kag berdugo nga tropa sang 62ndIB nga tuyo magreyd sa nakakampo nga yunit sang NPA sa sityo Cupad, Brgy Macagahay, Moises Padilla, Negros Occidental sadtong Hunyo 13, alas 9:00 sang aga.

Patay ang 3 ka tropa sang 62ndIB sang asud-asod nga ginpalukpan sang 2 ka granada ang nagaginahod kag nagapunsok nga tropa militar sa naubos nga bahin sang tereyn sang encounter site sa Sityo Cupad, Brgy Macagahay, Moises Padilla. Organisado nga naka-atras ang NPA kag nagligad ang pila ka minutos liwat naman nga nasumalang sang nasambit nga yunit sang NPA ang isa sa mga blocking force sang pasistang tropa. Liwat nga naglinukpanay kag gilayon nga nakagwa ang yunit sang NPA sa mga kolum sang militar sa nasambit nga lugar nga natabu-an sang engkwentro. Madamo pa sang kaswalti sa hanay sang militar sang natabo ang cross-fire sa tunga sang ila hanay bangud makita kag mabatian pa sang naka-atras nga yunit sang NPA nga padayon ang bayluhanay sang dalagko nga lupok nga nagatupa sa ubos nga bahin diin dira man nahamtang ang isa pa ka kolum sang militar nga nagalagas sa naka-atras nga NPA unit. Hungod naman nga ginlimod sang militar sa publiko ang ila mga kaswalti.

Wala sang kamatuoran nga may duha nga kaswalti sa hanay sang NPA. Matawhay nga naka-atras ang NPA samtang mabatian pa ang ang linupok tubtob alas 10:30 sang aga.

Mabaskog man nga ginakondenar sang LPC-NPA ang pagpatay sang militar sa 2 ka mangunguma kag sibilyan nga sanday Benjie Ebarle sang Sityo Bungaw, Brgy. Trinidad, Guihulngan City kag Roweno Anubong sang Ssityo Agogolo, Brgy Macagahay, Moises Padilla bangud sang patarasak nga pagpaniro sang pasistang tropa militar sang natabo ang engkwentro.

Ginapakamalaot man sang LPC-NPA ang ilegal nga pag-aresto sang desperadong 62nd IB sa isa ka construction worker nga pamatan-on nga si Aldren Valbueno, 20 anyos sang sityo Manta-uyan, Brgy Macagahay, Moises Padilla. Si Valbueno ang bag-o lang nagpauli sa ila puluy-an gikan sa iya trabaho sang ilegal siya nga gin-aresto sang militar sadtong Hunyo 16, 2023. Si Aldren Valbueno ang gintamnan sang 45 cal. pistol kag military pack. Pilit nga ginpa-ako sang berdugong militar nga katapo siya sang NPA.

Ang padayon nga pagpanglapas sang militar sa tawhanon nga kinamatarung sang pumuluyo sa lugar kag pagpalapnag sang mga kabutigan ang nagabuyagyag sang pagka-desperado kag tatak sang pagkapasista sini. Gusto lang nga hinabunan sang 62nd IB ang ila mga kalutusan kag kapalpkan sa pagpakig-away batok sa NPA sa Central Negros.

Samtang nagasingki ang paglala sang krisis sa ekonomiya kag pulitika sa sistemang malakolonyal kag malapyudal sa pungsod diin ginadingot ang pagpatuman sang matuod nga reporma sa duta kag pungsodnon nga industrialisasyon, subong man padayon nga nagaluntad ang pagbayolar sang tawhanon nga kinamatarung nga nagapatay sang demokrasya kag pungsodnon nga kahilwayan, padayon man nga maga-usbong ang paghimakas sang malapad nga pumuluyo. Padayon nga magadako ang pwersa kag kusog sang NPA gikan sa nagahimakas kag pigos nga pumuluyo nga maga-uyat sang armas agud isulong ang Demokratiko nga Rebolusyon sang Banwa sa pagpukan sang imperyalismo, burukrata-kapitalismo kag pyudalismo upod na ang pagdugmok sa mapintas nga makinaryas sang reaksyonaryong estado.

Silotan kag pabayaron ang berdugong 62nd IB sa ila mga kalapasan sa Pumuluyo sa mga kaumahan sa Central Negros! Isulong ang inaway banwa tubtob sa kadalag-an!###