Sa nagadayong mass surrender campaign sa rehimeng US-Duterte, gi-anunsyo sa AFP nga 8,000 na ka NPA surrenderees ang natala sukad mitongtong sa poder si Duterte. Gipamahayag sa nasudnong pamunoan sa CPP-NPA, sa pikas bahin, nga dakong bakak ug pang-pogi points lang kana para matabonan ang kapalpakan sa pasistang panganti nga puohon ang rebolusyonaryong pwersa sulod sa 2018. Gidugang pa sa CPP nga ang dakung nabulahan sa fake surrenderees nga gipapasiatab sa pasistang rehimen mao lamang ang mga upisyales sa AFP nga mibulsa sa minilyong badyet niini.

Niay update sa maong mass surrender campaign.

Bulan sa Agosto 2018, gipahigayon didto sa 44th IB Alpha Company ang usa ka mass surrender ceremony alang sa 68 ka ordinaryong masang sibilyan nga naggikan sa mga bukirong bahin sa sa Barangay Balagon, Siay, Zamboanga Sibugay Province. Niining 68 ka giilang surrenderees, 15 niini ang gipatawag sa Alpha Company camp nga bag-o lang nagbutang og kampo sa maong barangay aron motambong sa usa ka Christmas party didto sa 44th IB headquarters nga nakabasi sa lungsod sa Imelda, Zamboanga Sibugay Province. Aron mahatagan og insentibo, ang imbitadong motambong sa maong Christmas party gipasaligan sa kasundalohan nga makadawat og P15,000 kada usa. Midugok ang kapin sa 200 ka masang mag-uuma ug lumad gikan sa magkanait nga mga lungsod sa Naga, Kabasalan, Diplahan, Imelda ug Bayog.

Sa maong okasyon, gitratar ang mga masa sa mga pakigpulong sa mga upisyal sa kasundalohan nga ang unod nga punto mao ang pagkab-ot sa kalinaw pinaagi sa pagpasurender sa dugang pang mga masa ug puohon ang NPA pinaagi sa tabang sa mga sibilyan.

Ang P15,000 usa ka patoro lang para dugokon ang Handog Regalo Christmas party. Walay ni usa ka masa nga nakadawat. Apan nalipay na pud unta ang mitambong kay gipanghatagan sila sa tag-lima ka kilong bugas, pipila ka latang tinapa ug susamang ihap sa noodles nga Quick Chow.

Apan ang Handog Pamasko para sa masang surrenderees sa taga-Balagon may bug-at nga presyo nga gibayran hangtod karon.

Sa unang semana sa Enero 2019 , 68 ka nga nalista isip masang surrenderees sa Barangay Balagon gipatawag na usa katigoman didto sa Alpha Company HQ nga nagbase sa maong baryo.. Sa maong tigom, gi-anunsyo nga usa ka communal farm ang pabarugon para magsilbing proyekto sa mga sundalo nga nagpuyo sa ilang military camp. Ang himuong komunal nahisulod sa usa ka 20-ektaryang anoton nga yuta nga gipanag-iyahan sa usa ka Diding Paras nga may lapad nga kayutaan sa maong barangay. Para paspas mahuman ang paglimpyo sa kaanotan ug matamnan sa goma sa Enero 20, 2019, gibahin ang pagtrabaho kada adlaw ngadto sa (4) ka grupo nga may 15-16 ka tawo matag grupo.Nagsugod ang paglampas niadtong Enero 8, 2019.

Apan human sa tulo ka adlaw, nadiskobre sa giingong mga surrenderees nga wala diay kini libreng kaon ug nakasamot pa kay wala diay kini sweldo. Nabiyaan sa masa ang pagtrabaho sa ilang kaugalingong baol ug naandang panginabuhian. Masuko pa gyud ang mga kadreman sa 44th IB nganong nagkagamay ang nagasalmot sa komunal, gikan sa 68, nga misurender, ang mitunga sa unang adlaw 48 lang ug nagkaubos pa ang ihap.

Kini nga isyu sa pagpatrabaho nga walay tugbang sweldo ug pagkaon usa ka porma sa pagpahimulos ug pangdaugdaog sa masa nga daan nang kulang o walay trabaho ug daan nang kulang sa pagkaon. Gamay lang kini nga isyu kay ang 68 ka nagmulo nga tawo tipik lamang sa usa ka hilit nga barangay sa kabukiran ug ang usa ka barangay usa lamang sa kapin 2,000 ka barangay sa tibuok Zamboanga Peninsula Region. Gamay tinuod nga isyu apan dako kini nga isyu alang sa minilyong ordinaryong mga tawo nga wala na gani igong gikaon, pugson pa sa pagpatrabaho nga walay bayad.

Nahitabo kini nga pangabuso sa tawhanong katungod sa katawhan ubos sa klima sa kahadlok sa masa atubangan sa walay pugong-pugong nga pagbakyaw sa pasistang kabangis ug panglingla ubos sa martial law sa pasistang rehimeng US-Duterte.

Ang baruganan sa NPA niining forced labor nga gipahamtang sa Alpha Company – 44th IB ngadto sa gitawag nilang mga mass surrenderees sa barangay nga nasangpit sa itaas:

Angayan mahatod kini ngadto sa publiko ug sa mga lokal nga upisyales sa lokal nga kagamhanan kun wala man sila masayod niini. Gikan sa provincial, municipal ug barangay level, ug angayan undangon kini nga pasistang pangabuso.

Ang Oplan Bayanihan sa rehimeng US-Duterte nagpahat og binilyong badyet sa AFP matag tuig aron kunohay ipatuman ang counter-insurgency plan sa pagpuo sa NPA nga “wholistic” ug “people-centered” kunohay. Wholistic kay tinibuok ang pamaagi: military, economic ug political approach.

Dakung limbong sa atubangan sa publiko nga ang giingong “people-centered” approach sa Oplan Bayanihan nagkahulogan lang diay sa pinugos nga mass surrender ug pagkahuman pahamtangan sa silot nga forced labor.