Isang dekada na ang nakalipas mula nang makamit ng Pilipinas ang tagumpay na husga ng Permanent Court of Arbitration (PCA) ng United Nations on the Convention on the Law of the Sea (UNCLOS) hinggil sa hidwaan sa West Philippine Sea (WPS) laban sa China. Ngunit nananatiling bigo ang reaksyunaryong estado na igiit ang soberanong karapatan dito ng mamamayang Pilipino. Sa halip na magsilbi sa pagpapasigla ng diplomatikong proseso para lutasin ang hidwaan sa China, ginagamit ito ngayon ng rehimeng Marcos para sumunod sa dikta ng imperyalismong US na ipatupad ang militaristang hakbang ng huli.

Mamamayang Pilipino ang isinasangkalan ni Marcos Jr sa pagpapakasangkapan sa planong gera ng US laban sa China. Patunay dito ang paulit-ulit na paggigiit ni Gilbert Teodoro, Kalihim ng Department of National Defense ng dagdag na pondo para sa “eksternal” na depensa na aabot ng tumataginting na 4% ng Gross Domestic Product ng Pilipinas.

Matatandaang noong 2016, hinusgahan ng PCA ng UNCLOS na walang batayan ang 9-dash line ng China, at kinilala ang soberanong karapatan ng Pilipinas sa 200-nautical miles na exclusive economic zone at continental shelf nito sa WPS. Inilinaw din ditong nilabag ng China ang soberanong karapatan ng Pilipinas sa panghihimasok sa WPS upang magtayo ng istruktura at pakinabangan ang mga mayamang rekurso nito.

Patuloy at lumawak pa ang ganitong mga paglabag ng China, na nakasasagka sa malayang pangingisda at paglalayag ng mga Pilipinong mangingisda. Ito ay sa harap ng agresibong pagtugon nito sa sunud-sunod na pinagsanib na ehersisyong militar ng US, Pilipinas at iba pang mga kaalyadong bansa sa mga karagatan ng Pilipinas.

Habang patuloy na napagkakaitan ang mamamayang Pilipino sa sariling karagatan, pilit ipinatatanggap sa isip ng publiko ang direktang pagpwesto ng US sa bansa sa ngalan ng “pagtatanggol” sa gera. Upang upatan ang galit ng mamamayang Pilipino laban sa China, kamakailan lamang ay nagpakalat ng balitang diumano’y idineklara ng China na bahagi nito ang Batanes dahil sa heyograpikal na ekstensyon ito ng Taiwan. Ang mga pahayag na ito diumano ng ekspertong Tsino ay pinaypayan ng husto ng US at mga ahente nito sa Pilipinas gamit ang masmidya at social media. Ginagamit itong katwiran upang patuloy na magpakatuta sa US at suportahan ang gera sa tabing ng “pagdedepensa”, at pinakamasahol, ng “patriyotismo” at “pagkamakabayan”.

Sa patuloy na pang-uupat ng gyera ng US sa China gamit ang Pilipinas at mga karatig-bansa sa anyo ng mga magkakasanib na ehersisyo at okupasyong militar at pang-aabuso ng “karapatan sa malayang paglalayag”, itinutulak lalo nito ang China na lalong paigtingin ang presensya at aktibidad nito sa WPS.

Ang mga mapang-upat na hakbanging ito ay lalong nagpapalala ng kalagayan at naglalagay sa balag ng alanganin hindi lamang ng usapin ng diplomasya sa pagitan ng China at Pilipinas kundi sa kapayapaan sa rehiyong Asia Pacific at buhay ng mamamayang Pilipino. Kasabay ng pilit na pagtanggap ng presensya ng mga tropang Amerikano sa bansa ang unti-unting pagkintal sa isipan ng mamamayang Pilipino na lunukin ang gerang agresyong niluluto ng imperyalismong US.    Lahat nang ito ay para isulong ang imperyalistang interes ng US na manatiling pinaka-makapangyarihang superpower sa daigdig at itumba ang China na tinitingnan nitong pangunahing karibal sa Asia Pacific sa buong mundo. Magsisilbi din ito sa pagbundat sa military industrial complex nito sa gitna ng naghihingalong ekonomya ng imperyalismong US.

Ang tunay na kalayaan at pagkakamit ng pambansang soberanya ng Pilipinas ay ganap na matatamasa lamang ng bayan sa pagkawala nito mula sa kuko ng imperyalismo, pangunahin ng US. Maisasakatuparan ito sa landas ng pambansa demokratikong rebolusyon na layong makaalpas ang buong bayan sa tanikala ng imperyalismong US at puksain ang pyudalismo at burukrata kapitalismo na mga kasabwat sa paghahari at nagpapahirap sa bayan.

Habang nagpapalakas, marapat buuin ang malapad na nagkakaisang prenteng anti-imperyalistang US ng sambayanang Pilipino. Itakwil ang pang-uudyok ng imperyalismong US gamit ang panghihimasok ng China sa WPS. Ipokrito ang US sa pagsangkalan ng panghihimasok ng China gayong naglipana ang mga base militar nito sa buong bansa. Sa Timog Katagalugan, dapat palakasin ang mga paglaban para palayasin ang mga base militar nito sa Palawan (Puerto Princesa at Balabac Island) at Mindoro (Lubang Island), at ang pinaplanong base sa Cavite (Sangley Point sa Cavite City). Ilantad at itakwil ang mga pakanang Pax Silica na siyang magsusustento sa karerang pang-ekonomya at pangmilitar ng US laban sa China.

Dapat nating igiit sa China ang ating soberanong karapatan sa WPS kaakibat ay itaguyod ang mapayapang resolusyon ng mga hidwaan sa South China Sea, kasama ang iba pang bansang apektado. Dapat nating ipaglaban ang karapatan ng mga mamamalakayang Pilipino na mangisda at ang demilitarisasyon sa mga karagatang saklaw ng Pilipinas.

Kasabay ng pagpapalakas ng anti-imperyalistang pakikibaka ng bayan, dapat na magsilbi ito sa pagpapalawak at pagpapalakas ng NPA, ang tanging hukbo na tagapagtanggol at tagapagtaguyod ng pambansa at demokratikong interes ng mamamayang Pilipino. Sa landas ng kilusang pagwawasto, magpakabihasa sa digmang bayan at magtipon ng maliliit hanggang papalaking mga tagumpay na magsisilbi sa pagdaluyong ng rebolusyonaryong kilusan sa bansa.