Mabaskog nga ginakundenar sang Leoanrdo Panaligan Command-New People’s Army (LPC-NPA) ang padayon nga pagpangilkil sang 62nd IB sa mga pumuluyo sa Central Negros.

Wala-huya kag lampingasan nga ginagamit sang pasistang tropa ang mga traidor sa masa kag rebolusyon. Ginpahug kag ila ginpatalang ang mga pumuluyo gamit ang ngalan sang LPC-NPA agud huthutan sang kantidad sang kwarta ilabe na ang mga magagmay nga plantadores sang tubo bisan pa sa tunga sang krisis tuga sang barato nga presyo sang kalamay kag resulta sang neoliberal nga agresyon sa industriya sini.

Agud musingan ang NPA, desperado nga gingamit sang militar sa pagpangilkil amo ang mag-asawa nga si Renante Mission @Karding/Tibor/Eman kag iya asawa nga si Renalyn Omboy @Mulan/Dayna kag iban pa nga mga surrenderees.

Kaangot sini, ginapanawagan sang LPC-NPA sa tanan nga pumuluyo sa Central Negros ilabe na sa mga negosyante, plantadores sang tubo kag mga agalon may duta nga indi gid magpati kag magpahaylo sa ila pagpanginto. Mahimo nga ireport gilayon sa malapit nga yunit sang NPA para mahimuan sang gilayon nga tikang para pasabton ang militar kag personalidad nga may kahilabatan sa sini nga kalakasan.

Ang NPA amo ang inyo tunay nga hukbo nga handa magpangapin sa ginahimuslan kag ginapigos nga sahing anakbalhas. Ang malig-on nga pag-isa kag pagbinuligay sang NPA kag sang malapad nga masa dira sa pagpamuno sang Communist Party of the Philippines (CPP), malab-ot naton ang tunay nga demokrasya kag pungsodnon nga kahilwayan nga nakabase sa hustisya-sosyal.

Maghimakas indi mahadlok! Isulong ang inaway banwa tubtob sa kadalag-an!