Halos apat na kaadlaw nga ginaperwisyo sang 50 ka tropa sang berdugong 62nd IB ang mga kabataang-estudyante nga bumulutho sang Kambairan Elementary School, sa Sityo Kambairan, Barangay Trinidad, Guihulngan City, Negros Oriental lakip na ang mga manunudlo sa nasambit nga buluthuan.

Sa pihak sang masami nga gina reklamo sang mga ginikanan, estudyante kag mga manunudlo ang presensya sang militar sa lugar, wala huya nga ginhimo kampo-militar sang pasistang tropa ang Kambairan Elementary School sumugod pa sadtong Enero 6 sang gab-i tubtob subong. Ini maathag nga lapas sa Comprehensive Agreement on Respect for Human Rights and International Humanitarian Law (CARHRIHL).

Lubos man nga ginakabalak-an sang mga ginikanan kag manunudlo ang pagtiner sang militar sa eskwelahan kay masami ginahimo sang nga tropa sang 62nd IB ang pagpagwa sang malaswa nga mga palaggwaon atubang sa presensya sa mga pamatan-on lakip na ang minor de edad nga mga kabataan. Ginakahangawa sini nga mangin biktima ang ila mga kabataan kag estudyante sa pang-abuso sekswal sang militar.

Madumduman nga pila na ka beses nga ginreklamo sang mga residente sang Barangay Trinidad ang pagpangsaka-saka kag pagtiner sa mga kabalayan sang mga mangunguma ang berdugong 62nd IB nga nagapanglapta sang ila mga higko kag basura. Subong man ang puguso nga pagpilit sa mga sibilyan nga mag surrender kay kuno supporter sang NPA.