Mahugot nga ginpapahimuwa san Bagong Hukbong Bayan sa Northern Samar an mga alegasyon san 78th Infantry Battalion nga mayda mga command-detonated explosive (CDeX) nga nakalubong sa erya san Barangay Magsaysay, Mapanas. Pataraw-an ngan nangangamyon sin desperasyon an hepe san batalyon nga si Lt. Col. Francis Rosales ngan an iya igkasi sundalo sa pag-recycle san mga daan nga CDeX agud maghinimu-himo na liwat sin mga buwa nga kadaugan kontra sa hukbo san katawhan.

Baga sin diri pa gud kuntento ini nga mga pasista nga tropa sa ira magtambok nga suhol, alawans ngan bonus ngan karuyag pa nga matagan sin pahalipay sa pag-recycle san pira-katuig na nga higamit militar, pareho san ira pagparayaw san mga gin-recycle nga “surenderi.”

Nagyinawyaw pa sira sin kalurungan hiunong sa paggamit san BHB sa CDeX, nga gintutugutan san internasyunal nga makatawo nga balaud ilarum san Ottawa Treaty — butang nga maaram unta sira kun nagbasa sira sini. Diri sugad san 500-libras nga “smart bomb” san AFP (nga ha ungod bulok gud ha pagdurot sin waray pili nga destroso sa umhanan ngan ugmad sa mga sibilyan nga komunidad), an CDeX nga gamit san BHB subay sa disenyo mas eksakto dara kay nagdudurot la ini sin kahibangan sa limitado nga lupgop, pakapabuto san trigger ngan kahuman san mauyatom nga pangandam san mga Pula nga mangaraway kontra sa mga lehitimo nga panmilitar nga target.

Katapos pamatud-an nga tapang gud siya sa IHL, pakyas naman nga ginladawan ni Lt. Col. Rosales an AFP komo tag-undong san tawhanon nga katungod. Lugod, mga tag-undong sira san terorismo; maaram na an masa nga parag-uma nga diin mayaon “ginpapintas ngan sustenido nga focused military operations,” bug-os nga mga barangay sugad san Barangay Magsaysay ginhihimo nga hamlet ilarum san ira direkta nga panmilitar nga kontrol. Barubatalyon nga unit an nagsusulaysukay san palibot nga umhanan ngan kagurangan, diin diri gintutuyangan an mga parag-uma bisan kun mga surok nira ini sin pakabuhi ngan kun diri pupusilon sira kun makit-an. Ginpipirit sira nga sumurender sa mga hinimu-himo nga krimen o subay sa terorista nga “Anti-Terror” Law. Ngani an Barangay Magsaysay usa sa pinakamilitarisado nga baryo sa Pasipiko nga erya san Northern Samar. Waray iba nga dara an presensya san militar dinhi sa katawhan kundi pag-inantos.

Diri nauuwat an masa nga parag-uma san Northern Samar san mga buwa san 78th IB. Kada adlaw testigos sira san waray wantas nga panalapas san ira mga katungod san pasista nga AFP; kada adlaw naantos sira san tikagrabe nga ekonomiko nga kakurian ilarum san dunot nga sistema nga ginpapanalipdan san AFP. Tungod sini nga mga kundisyon padayon nga nagtatagamtam an BHB sin mapaso nga suporta san katawhan ngan napasulong sa butnga san tikagrabe nga pasista nga terorismo san estado sa kabaryuhan. Sa dayuday makakatirok ini sin sadang nga kusog pinaagi san mga taktikal nga opensiba ngan pagpasulong san gerra san katawhan tubtub sa kadaugan sini.