8 “cleared barangays” sa Isabela, tuburan sang korapsyon kag pagpangilkil sang 62nd IB kag ni Mayor Irene Montilla

Mabaskog nga ginakondenar sang Leonardo Panaligan Command-New People’s Army (LPC-NPA) ang puguso nga pagpangilkil kag korapsyon sang matag-as nga opisyal sang 303rd Bde PA ilabe na ni Col. Orlando Edralin kag Col. William Pesase sang 62nd IB sa mga gintumod sang NTF-Elcac nga walo ka cleared barangays sa banwa sang Isabela, Negros Occidental.

Nadumduman sang nagliligad nga mga pahayag sang tagtaghol sang pasistang militar sa Isla, daw ginapadayaw pa sang 303rd BdePA nga hilway na sa presenya sang NPA ang banwa sang Isabela. Dugang pa sang militar nga persona non-grata ang CPP-NPA sa lugar.Ginapadayaw man sang militar nga ang walo ka cleared barangays ang nakabaton na sang tag P20 milyones para sa Barangay Development Program.

Lunsay kabutigan kag pagpatalang ang ginasugid sang militar. Ang matuod bisan isa ka barangay nga gintumod sang NTF-Elcac ang wala gid makabaton sang nasambit nga kantidad. Suno pa gani sa pumuluyo sa natungdan nga mga barangay, indi P20 milyones kundi Php2-4 milyones lamang ang ila nabaton para sa Barangay Development Program (BDP) kag ini ang gina-utay-utay pa.

Makahuluya pa gid kay ginapilit sang militar ilabe na ang mga Commanding Officers sang mga army detachment sa nasambit nga banwa nga mag-contribute sang tag P3,000.00 ang mga Barangay Kapitan sang natumod nga walo ka barangay sa kada bulan para sa panginahanglanon sang mga katapo sang 62nd IB sa sulod sang 62nd IBPA, Bn Headquarters nga nahamtang sa Brgy. Libas, Isabela.

Maathag nga ang BDP nga ginapadayaw sang NTF-Elcac upod kay Col. Edralin sang 303rd BdePA kag Col. Pesase sang 62nd IBPA kakunsabo si Mayor Irene Montilla sang Isabela ang nahimo nga gatasan kag source of corruption sang militar kag Municipal Chief Executive.

8 "cleared barangays" sa Isabela, tuburan sang korapsyon kag pagpangilkil sang 62nd IB kag ni Mayor Irene Montilla