Kadungan sang pagpatuman sang reaksyonaryong gobyerno sa ila kontra-rebolusyonaryong kampanya nga amo ang National Action Plan for Unity, Peace, and Development (NAP-UPD), mas nagalapta kag nagadamo ang mga operasyong militar nga gintigayon sang AFP, partikular na sang 94th IB, sa mga kabukiran sang Himamaylan City kag Binalbagan, Negros Occidental. Nareport ang madamuan nga bayolasyon sang tawhanong kinamatarung nga ginkomiter sang nasambit nga tropa militar.

Nobyembre 04—gindakop si Anoy Pacheco, isa ka Indigenous Peoples (IP) member, samtang nagalakat ini pakadto sa iya uma, sa Sityo Tigbao, Barangay Buenavista, Himamaylan City. Suno sa mga nakakita, gindala si Pacheco sa mga unipormado nga militar idalom sang 94th IB. Si Pacheco, anak man sa isa ka “Kalanyan” ukon lider tumandok sa ila lugar idalom sa Tribu Magahat-Bukidnon. Ginpablotter ini sa mga pamilya sadtong Nobyembre 7, apang tubtob subong wala pa sa le mahibalo kon diin gindala sa militar ang ila himata.

Sang Oktubre 25, sa Sityo Cantupa, Barangay Buenavista, Himamaylan City, pilit nga ginpasurender sang uhaw sa dugo nga mga tropa sang 94th IB ang mga sibilyan nga sanday Epi Villacanao kag Maita Flores. Luyag nila nga malakip ang mga biktima sang ila puno sang korapsyon nga E-CLIP Program agud makabulsa sang dako nga balor sang kwarta ang ila mga amo nga ara sa posisyon.

Sadtong Oktubre 28 sa amo gihapon nga lugar, ginransak ang balay ni Remy Villacanao, isa ka mangunguma. Pagkatapos sini, nagkadto ang mga militar sang balay ni Chona Martinez, iloy ni Jolina Martinez nga ginpatay sang militar upod ang iya bana nga si Mark Encancion sadtong 2024. Ginpalibutan sang militar ang balay ni Martinez samtang ginpahug siya kag gin-imbestigar.

Samtang sa mga sityo sang Lomboy, Pitong, Candida kag iban pa nga katambi nga mga sityo, nga sakop sa Barangay Biao, Binalbagan, Negros Occidental, nagreklamo ang mga pumuluyo sa halit nga gintuga sang mga ido sa berdugong militar nga nag-opereyt sa erya. Masobra 30 na ka kanding ang ila ginpatay kag bisan ara na gid ang ebidensya, wala sila nagahatag sang bayad-danyos sa mga biktima. Gin-into nila ang pumuluyo paagi sa pagbasibangud nga aswang lang daw ang nagpatay sa ila mga kasapatan kabangdanan nga lubos pa nga ginkaakig sa pumuluyo.

Ginapakita sini nga magluwas sang natural nga mga kalamidad nga nagaguba sang pangabuhi sa mga pumulluyo, ang teroristang 94th IB ang mas dako nga delubyo nga nagapaantus sa ila. Gani, hugot nga ginkundenar sang RNC-NPA ang ini nga mahigko nga pagpang-atake sang militar sa mga sibilyan kag tumandok sa lugar. Nagapanawagan man ini sang mga taong-simbahan, peace advocates, youth sector kag iban pa nga mga organisasyon nga naga-amlig sang tawhanon nga kinamatarung nga mabuyagyag ang mga hinimuan sang berdugong militar sa kabukiran man kag kasyudaran.