Read in: English

Ginreport yana han Bagong Hukbong Bayan (Rodante Urtal Command o NPA-RUC) an madinaugon nga taktikal nga opensiba ha usa nga kapitan han barangay ha Las Navas nga nagserbe komo aktibo nga aset han death squad han 20th Infantry Battalion.

Subay ha mga inisyal nga report, ginsirutan han mga Pula nga mangaraway han NPA-RUC hi Crispin “Espot” Nali Mordido, kapitan han Barangay San Andres, hadton Hulyo 10 ha apiki nga Barangay Lourdes.

Nagserbe komo aktibo nga impormer hi Mordido para kan Peping Cabides, lider han death squad han 20th IB, sigon kan Ka Amado Pesante, tagapagyakan han NPA-RUC.

Kaupod ha mga biktima hini nga death squad hira Apolinario “Kap Pening” Lebico, barangay captain han San Miguel, Las Navas, ngan Jennifer Tonog, barangay councilor han Sumuroy, Lope de Vega, nga ginpatay han grupo hadton 2019 ngan 2020.

Dugang ni Pesante, ginpwersa liwat ni Mordido an mga inosente nga sibilyan ha ira barangay nga “sumurender” komo kaapi han NPA.

Komo baton ha insidente hadton Hulyo 9 ha Barangay Victory, Las Navas, nagsering hi Pesante nga ginhuhulat pa han NPA-RUC an report tikang ha lokal nga yunit han NPA. Nanawagan hiya ha publiko nga diri la anay maghusgar.

“Ginseseguro namon ha publiko nga ha pagpatuman han mga taktikal nga opensiba, permi gin-uuna han NPA an katalwasan han mga sibilyan. Kun mapamatud-an an diri gintuyo nga kaswalti, andam gud an NPA-RUC nga maghatag hin bulig ha mga biktima,” sering ni Pesante.#