Lubos nga ginakundenar sang Armando Sumayang Jr Command-New People’s Army (ASJC-NPA) ang padayon nga pagpangatake kag pagpanglapas sang 15th IB sa tawhanong kinamatarong sa pumuluyo sang Southwest Negros.

Sadtong Agosto 9, gindakop ang bata ni Morita, isa ka mangunguma, sa Sityo Gut-ak, Barangay Abaca, Cauayan, Negros Occidental bisan ini may problema sa pamensaron. Bangud sa kasubo sang amay, na stroke ini kag napatay.
Natabo ini samtang nag-operasyon ang 15th IB sa amo nga lugar.

Subongman, naga-operasyon ang mga mersenaryong tropa sa mga nabukid nga bahin sang Sipalay City, Negros Occidental. Sadtong Setyembre 11, gindakop si Arnold Perolino kag isa ka alyas ‘Orig’ sa Sityo Pinus-an sakop sang Barangay Camindangan, sa nasambit nga syudad. Ginpatupatuan si Orig sang isa ka kaso sang murder, kag tubtob subong, yara pa sila sa kustodiya sang 15th IB.

Ini nga mga krimen sang militar sugpon sa ila wala untat nga militarisasyon sa Southwest Negros, partikular sa syudad sang Sipalay, kag mga banwa sang Candoni kag Hinobaan. Amo nga paslaw ang 15th IB sa ila pagpamutig nga wala na sang larangan gerilya sa lugar bangud nagapabilin pa gihapon ang ila presensya sa mga komunidad sang mga mangunguma kag nagapanghalit sa pumuluyo kag nagadepensa sila sa interes sang mga komprador-agalon nga amat-amat nagawasak sang pangabuhian sang pumuluyo kag kapalibutan.

Ang ini nga mga serye sang krimen sang 15th IB sa idalom sang National Action Plan for Unity, Peace and Development (NAP-UPD) sang rehimen US-Marcos II nagapadayon sa ila kontrarebolusyonaryong kapintas para wasakon ang diwa kag kamadmaran sang pumuluyo nga magbato para sa matuod nga hustisya kag kahilwayan.

Sa pihak bahin, ang militar mismo ang nagatuga sang kundisyon nga mag-intra ang pumuluyo sa rebolusyon para depensahan ang ila kabuhi kag pangabuhian. Ang sahing anakbalhas kag iban pang ginahimuslan indi malikawan nga mag-uyat sang armas bangud sila mismo ang nakaeksperensya sang wala tupong nga terorismo sang estado.

Gani, ini nga mga kundisyon ang nangin indi mahubas nga tuburan sa Pulang Hukbo sa masobra na lima ka dekada sa pagsulong sang armadong paghimakas, agraryong rebolusyon kag pagtukod sang baseng masa.