Gin-ambush sang isa ka yunit sang New People’s Army, sa idalum sang Mt. Napulak Command sang Larangan 11, sa sur nga bahin sang Panay ang isa ka iskwad sang RPA-ABB. Nagalakat ang mga ini pabalik sa ila ginaistaran nga balay sa Brgy. Jawod, San Joaquin matapos magpakitang-gilas sa fiesta sang Brgy. Camia, San Joaquin, Iloilo, mga alas 4 ang takna sa hapon. Naglawig sang 7 ka minutos ang pagbayluhayanay sang lupok. Nagresulta ini sa 4 ka kaswalidad sa bahin sang RPA-ABB kun sa diin 3 ang pilason kag 1 ang patay. Sa nagkalapilasan, 2 ang nakilal-an nga sanday Ramie Cataluna Y Carnaje, 34 anyos sang Brgy. Danao, Janiuay, Iloilo kag ang isa ginatawag nga si Chief Nilo. Ang isa nga napatay gindala sa isa ka punerarya sa banwa sang San Joaquin kag gintago ang identidad sini. Samtang sa bahin sang NPA, matapos ang halos isa ka oras nga pag-clear sang erya, nakakuha sang granada, magazine kag mga bala kag hilway nga naka-atras nga wala man sang nasamaran.

Ang ini nga aksyon militar amo ang sabat sa mabaskog nga demanda sang pumuluyo nga silutan ang RPA-ABB sa malawig na nila nga rekord sang kalainan nga ginpanghimo. Lakip na diri ang pagpamahog, pagpanakit, mga malala nga kaso sang pagpangawat sang kasapatan sang masang mangunguma pareho sang baka kag karabaw, pagpanglugos sa isa ka babayi nga menor de edad kag madamo nga kaso sang pagpamatay.

Sa nasambit nga hitabo, may pipila nga nakulbaan nga balikan sang RPA-ABB apang mas matunog ang hinugyaw sang mga masa nga nagakinalipay sa sini nga kadalag-an.
Ang ini nga aksyon militar sang NPA nagapaabot sang mabaskog nga mensahe nga indi san-o man maga-ekseher ang mga kontra pumuluyo nga mga grupo kaangay sang RPA-ABB samtang ang New People’s Army padayon nga magapanindugan sa kahustuhan kag magadampig sa interes sang malapad nga pumuluyong ginapigos kag ginahimuslan.