Nagsaulog ug naghugyaw sa kalipay ang nagharing hut-ong, samtang ang masang nilupigan nabangutan ug nasubo sa pagkamatay sa ilang mga Pulang manggugubat nga naghatag sa ilang tanan sa pakigbisog sa mga pasistang mangtas sa Toboso, Negros Occidental kaniadtong Abril 19.

Baga ang fog of war nga mitabon sa Toboso samtang nagpuliki ang pasistang rehimen ni Marcos kauban ang mga itoy niining Armed Forces of the Philippines nga kontrolon ang naratibo ug ipakaylap ang sayop nga impormasyon. Ang kamatuoran kabahin sa gituohang mga engkwentro nga nahitabo kaniadtong Domingo sa buntag nagpabiling dili klaro. Napugos ang gatusan ka mga residente sa mga baryo ug komunidad nga biyaan ang ilang mga panimalay samtang gipahamtang sa mga pasista ang hingpit nga kontrol-militar sa lungsod.

Wala’y undang nga gipangdaot sa mga pasistang AFP ang mga nangapukan nga bayani sa katawhan isip mga “terorista” ug mga “kriminal” sa ilang desperasyon nga ipangatarunganan ang ilang wala’y kaluoy nga gubat sa pagpanumpo ug ilubong ang mga kaso sa grabeng pagpangabuso nga pasakit nila sa katawhan.

Ang katawhan sa Toboso mibalidad sa pagtoo sa mga bakak sa AFP. Sila ang unang makapamatuod kung unsa ka mapinanggaon nga nagserbisyo ang mga Pulang manggugubat sa NPA sa katawhan sa ilang adlaw-adlaw nga paghago ug sa ilang pakigbisog sa pagpanalipod sa ilang kaayohan ug katungod. Ilang gitratar ang mga manggugubat sa NPA isip ilang kaugalingong mga anak, nga naghatag og halangdong pag-alagad isip mga doktor, dentista, katabang sa umahan, ug mga magtutudlo sa ilang mga anak.

Atong hinumdumon ug pasidunggan ang nangapukan nga mga manggugubat sa Toboso. Atong saputan ang ilang mga lungon og Pulang bandila sa rebolusyon, itaas ang atong mga kamao, ug pakusgon ang atong mga tingog samtang nagamartsa aron ihatod sila sa ilang pahuwayanan.

Siguradong makaawhag ang sakripisyo ug kabayanihan sa nangapukan nga mga Pulang Manggugubat sa Negros sa mas daghan pa nga mosalmot sa pakigbisog ug pagpaasdang sa rebolusyonaryong kawsa. Mapukan man ang mga manggugubat sa katawhan, molahutay ang gubat sa katawhan. Ang yuta nga gibisbisan sa dugo sa mga bayani sa katawhan makapatumaw og mas daghang lider sa mga organisasyong masa, Pulang manggugubat sa New People’s Army, ug mga kadre sa Partido.

Taliwala sa dalang kangitngit sa nagkagrabeng pagpahimulos ug panaugdaog, pagpangilog sa kayutaan, pagpangawkaw sa langyaw sa mga adunahang natural nga kabtangan sa nasod, korapsyon, ug pasistang pagpanumpo ubos sa gikasilagan nga rehimeng US-Marcos, nagsidlak ang dalan sa malungtarong gubat sa katawhan samtang nagkadaghan ang katawhang mogunit og armas aron pakigbisogan ang ilang mga pangandoy alang sa nasudnong kagawasan ug tinuod nga demokrasya.