Pinakamataas nga pagsaludar ang gina halad sang Kabataang Makabayan-Panay sa tanan nga mga martir; mga bulahan nga pamatan-on nga nag halad sang ila kabuhi para alagaran ang masa nga ginahimuslan kag ginapigos.

Taliwas sa mapulok kag lantaran nga indibaduwalismo nga kinaiya sang pamatan-on sa burgis nga katilingban, wala sing duwa-duwa nga ging sakripisyo kag ging talikdan ang kabuhi nga na anaran, kag kung masami, kumportable, para magkapot sang armas kag pilion ang banas sang inaway-banwa para hilwayon ang katilingban sa kamot sang sistema nga padayon nagalubog sa pumuluyo sa wala-untat nga krisis.

Saksi ang malapad nga kaumhan sa mga nangin kabuhi sang mga namartir nga pamatan-on; saksi ang mga kabukiran sa kada tikang sang mga alima halin sa patag, sa batuhon nga mga talakladon, asta sa kung diin man sila madala sang pagpakig-away; saksi ang langit sa kung paano pirme gina pili ang magpadayon sa tunga sang indi malikawan nga kamatayon, apang ang kinahanglanon pirme nagahari; saksi ang masa, ang kada bala, ang kada hayahay nga pula.

Sa sulod sang 61 ka tuig, lubos nga nangin ebidante ang likas nga kaisog sang pamatan-on nga pilion ang interes sang masa, imbes sang iya kaugalingon. 61 ka tuig nga pagpamatuod nga samtang naga luntad ang wala untat nga pagpangawat sang kadutaan para sa mga mangunguma, pagbarat sa mga mamumugon sang sweldo nga makabuhi kag kinamatarong sa palamugnan, pagtaas sang matrikula kag pag komersyalisa sang libre nga edukasyon, pagpatay kag lantaran nga pag-atake sang estado sa tanan nga may ikasarang maghimakas sa ano man nga porma—samtang may ara sa gihapon sang bulok kag mapagpigos nga sistema—padayon nga may mga pamatan-on ang pilion nga mag kapot armas kag iduso ang pungsodnon demokratiko nga rebolusyon!

Sa kamatayon, kaangay lang sang pagtanom sang bag-o nga mga liso nga sa paglakat sang oras kag panahon, magabukad sa adlaw sang paghukom. Pamatan-on, malawig pa ang paghimakas apang kahimtangan ang magatulod sang paglabot sang aton kadalag-an, nagahulat ang masa, kag ang armas nga nabilin sang mga nagtaliwan, ginapaabot na ang mga kamot nga maga tangan sini!

Iduso ang pungsodnon demokratiko nga rebolusyon sa malawig nga inaway banwa! Mabuhay ang mga rebolusyonaryong martir! Mag-intra sa Bagong Hukbong Bayan!