Hugot nga ginatib-ong sang Kabataang Makabayan-Central Negros ang Demokratikong Rebolusyon sang Banwa paagi sa pangmalawigon nga inaway banwa nga gina-usoy nga banas sang New People’s Army (NPA) sa absoluto nga pagpamuno sang Communist Party of the Philippines (CPP).

Sa kaumahan, ginatib-ong man sang KM-CN ang pagsulong sang armadong paghimakas bilang nagapanguna nga porma sa paglunsar sang mga madinalag-on nga taktikal nga opensiba batok sa mga mapintas nga makinaryas sang reaksyonaryong estado nga Armed Forces of the Philippines (AFP), Philippine National Police (PNP), paramilitar, mga masupog nga kriminal kag malain nga elemento.

Nagabulig man ang KM sa pagtukod kag pagpalig-on sang baseng masa paagi sa pagpundar sang nga organong gahum pampulitika nga basehan sang nagaluntad nga rebolusyonaryong gobyerno.

Mabaskog man nga ginasuportahan sini ang NPA sa pagsulong sang agraryong rebolusyon agud hilwayon ang mga mangunguma kag mga mamumugon sa uma sa mga pagpanghimulos kag pagpamigos sang mga despotikong agalon may duta kag pasismo sang mapintas nga estado agud agawon ang poder sa kamot sang nagahari nga sahi nga ginagamhan sang imperyalismo, burukrata-kapitalismo kag pyudalismo.

Samtang sa kasyudaran, sekundaryong ginasulong ang legal kag demokratikong paghimakas gikan sa hugot nga paghiliusa sang sandigan nga alyansa sang sahing mangunguma kag mamumugon upod sa nagkalain-lain nga saray sang petiburgesya kag ispesyal nga sektor sang pamatan-on kag kababaenhan sandig sa mga patakaran kag programa sang Pungsodnon Nagahiliugyon nga Prente agud solbaron ang ugat sang halos masobra lima na ka dekada nga gyera sibil sa pungsod.

Lubos nga ginasuportahan sang Kabataang Makabayan sang Central Negros ang mga negosyador sang National Democratic of the Philippines (NDFP) nga amo ang nagatiglawas sa pangkabilugan kag pungsodnon nga pagpakigsugilanon sa kalinong para angkunon ang tunay nga paghidaet nga nakabase sa hustisya.

Maangkon lamang ini paagi sa pagpatuman sang matuod nga reporma sa duta kag pungsodnon nga industrialisation kadungan sa ginaduso sang mga pamatan-on kag kabataang-estudyante nga makimasa, maki-pungsod kag siyentipiko nga sistema sang edukasyon. Taliwas ini sa hapaw nga ginataw-taw sang AFP, PNP, NTF-Elcac upod sa local government unit sa isla nga “Localized Peacetalks.”

Mabaskog gid nga ginasikway sang KM-CN ang korus nga panawagan ni Cong. Cheding Alvarez-6th District sang Negros Occidental, Mayor Bading Escalante sang Cadiz City kag iban pa nga haciendero-agalon may duta kag burukrata-kapitalista sa isla kaangay ni Gov. Bong Lacson nga Localized Peacetalks. Handum sang mga ini nga biakon, patalangon kag pasungkaon ang pag-isa sang nagahimakas nga pumuluyong Negrosanon ilabe na ang CPP-NPA-NDF sa likod sang “kalinong.”

Kadungan sini ang mabaskog man nga pagkondenar sa Kabataang Makabayan sa pagdumili ni Sec. Gibo Teodoro sang DND nga padayon ang Peacetalk sa tunga sang NDFP kag GRP.

Ginapanawagan sang KM-CN sa tanan nga maayong anak sang banwa nga magpasakop sa New People’s Army. Isulong ang armadong paghimakas para sa matuod nga kalinong nga nakabase sa hustisya sosyal tubtob sa lubos nga Kadalag-an sang rebolusyong Pilipino.