Matapos nga ginmaksimisa sang 94th Infantry Battalion ang bilog sini nga pwersa sadtong Disyembre 2025 kag napaslaw ang ila operasyon militar, matalupangdan ang ila desperasyon nga maka-iskor sa porma sang pilit nga pagpa-surrender sang mga sibilyan.

Sa Sityo Cambudlis, Barangay Mahalang, Himamaylan City, Negros Occidental, apat na ka beses nga ginpatawag si Gemma Balsimo kag ang iya pamilya sa detachment sang 94th IB nga ara sa nasambit nga barangay. Ginpaidalum sila sang pasulit-sulit nga imbestigasyon. Kadungan sini, ginapahug man sila kag pilit nga ginapa-surrender, kabangdanan nga nagakahadlok subong ang pamilya Balsimo nga mabutang sa ital-ital ang ila kabuhi kag masunod sa natabo ni Junjun Benoy nga ginpasibangdan nga miyembro sang New People’s Army (NPA) kag ginpatay sang uhaw sa dugo nga mga militar.

Sini nga bag-ong tuig, nagagamit gihapon sang bulok kag daan nga taktika ang mga tropa militar agud mapamatud-an ang ila pasulit-sulit nga ginawakal sa mainstream media nga kuno paubos na ang NPA sa isla. Dugang diri, nagakinahanglan man sila sang damo nga mga sibilyan nga ibalandra isip mga ‘surrenderees’ kag ipasulod sang ila bogus nga E-CLIP agud makapangawat sang dako nga balor sa kwarta halin sang kaban sang pumuluyo.

Gani, ginasuportahan sang Romeo Nanta Command – NPA ang panawagan sang pumuluyo sa South Central Negros nga i-abolish ang NTF-ELCAC bangud ginawaldas lang sini ang kwarta sang pumuluyo para pahipuson ang mga nakigbato para sa demokrasya, hustisya sosyal, tawhanong kinamatarung, kag paglambo nga nagahatag prayoridad sa kaayuhan sang mayorya nga masang ginapigos kag ginahimuslan.