Mas nagasingki ang militarisasyon sa Central Negros nga nagperwisyo sa kadam-an nga mangunguma kag sibilyan sa lugar humalin Disyembre 31, 2025 tubtob subong.

Sa La Castellana, Negros Occidental:

Enero 13 sang hapon—ginransak sa anum ka elemento sang berdugong 62nd IB ang puluy-an ni Meldrid Bagnoran sang Sityo Cabadiangan, Barangay Camandag. Wala sang tawo ang balay sang natabo ang insidente kay ginpang-ukay ang ila mga pagkabutang. Madumduman nga sang Disyembre 28 samtang ara sa kalisod ang pamilya Bagnoran bangud nahaya ang patay nga lawas sang iya bana nga si Cerilo Bagnoran, lampingasan nga iligal nga ginlusob man sang nasambit nga tropa upod ang mga surrenderees kaangay ni Renante Mission @Karding/Tibor/Eman ang ilapanimalay. Ginpahug kag ginpasibangdan sila nga supporter sang NPA. Nagtuga ini sang kakugmat sa pamilya kag mga kabataan.

Sa Canlaon City, Negros Oriental:

Enero 13—pilit nga ginpatawag sang militar ang mga pumuluyo sa Sityo Gusa, Barangay Budlasan agud patambungon sa pulong-pulong sang 62nd IB sa Barangay Bucalan proper sang nasambit man nga syudad. Pilit sila nga ginapatug-an sa presensya sang NPA sa lugar.

Samtang Disyembre 31 tubtob sadtong Enero 15, 2026, padayon ang operasyon militar sang halos 120 ka pasistang tropa sang 62nd IB sa mga sityo sang Natuling, Malatanglad kag Tabalogo sang Barangay Budlasan.

Sa Moises Padilla, Negros Occidental:

Enero 12—ginpangtawgan man sang militar ang pribado nga cellphone number sang mga mangunguma sa mga sityo sang Nakuruhan kag Tiyos, sakop sang Barangay Quintin Remo. Ginpahug sila nga indi magsuporta sa NPA sa nagpakilala nga @Karding/Tibor/Eman sang 62nd IB.

Kadungan sini, ginlusob man sang militar ang komunidad sang mga mangunguma sa mga sityo sang Tubod, Sampungan kag Tagbak sakop sang Brgy Macagahay.

Ini man nga adlaw, ginapangsaka-saka man sang militar ang mga kabalayan sa sityo Cambundo, Arum kag Banat-e tanan sang Barangay Macagahay kag ginpangkuha ang mga cellphone sang mga residente kag ginpangbasa ang mga pribado nga mensahe.

Samtang sa Guihulngan City, Negros Oriental, may tropa militar man sa mga sityo sang Banderahan, Amumuyong, Columbia kag Kambairan sang Barangay Trinidad.