Abril 14- anum ka mga katapo sang 62nd IB nga nakasibilyan, nagpakilala nga mga katapo sang NPA sa Sityo Omot, Brgy Santol, Binalbagan. Nagapangsaka-saka sila sa mga kabalayan sa nasambit nga sityo kag nagapamilit nga magsulod sa mga puluy-an sang mga mangunguma. Kadungan sini, may pito man ka mga katapo sang militar nga nakasibilyan ang nagpakilala nga mga katapo sang NPA sa Sityo Dadyangao, Brgy Luz, Guihulngan City. Pilit nga nagapangsaka-saka sa mga kabalayan sa pagpamahug sa mga residente.

April 15, alas 4:00 sang kaagahon- iligal nga gin-aresto si Jerry Montefalcon kag Maricel Montefalcon, mag-asawa kag may mga kabataan sang Sityo Natuling, Brgy Budlasan, Canlaon City. Alas 5:00 sang kaagahon pilit nga gindala sang militar ang mag-asawang Montefalcon sa Canlaon City PNP station nga wala sang warrant of arrest. Wala man sang search warrant nga ginhalughog ang ila puluy-an. Nagtuga sang grabe nga kahadlok sang lima sini ka mga menor de edad nga mga kabataan.

Hasta subong Abril 16 – padayon nga nagatiner ang tropa sang 62nd IB sa mga komunidad sang mangunguma sa mga sityo sang Tubod, Subo kag Brgy. proper tanan sang Brgy. Macagahay, Moises Padilla, Negros Occidental. Mentinado ang mga kolum sang pasistang 62nd IB sa mga sityo sang Malatanglad, Owayan kag Natuling sakop sang Brgy Budlasan, Canlaon City. Padayon ang 100 ka tropa nga nagakampo sa Sityo Punong Elementary School, Brgy Trinidad, Guihulngan. May platun man sang 62nd IB nga nagatiner sa Sityo Kambairan Elementary School, Brgy Trinidad, Guihulngan City.

Nagatiner sa mga kabalayan kag simbahan ang 100 ka tropa sang 62nd IB sa Sityo Aguntilang-3, Brgy Riverside kag Brgy. Makilignit proper tanan sang Isabela, Negros Occidental.