Ang Roselyn Jean Pelle Command – Northern Negros Guerilla Front sang Bag-ong Hangaway sang Banwa (RJPC-BHB) nagpatuman sang mga standing order batok sa mga kontra-rebolusyonaryo kag malain nga elemento (KRME) sang Calatrava, Negros Occidental nga ginpapanaog sang rebolusyonaryo nga korte sang pumuluyo kag sa gubyerno sang pumuluyo.

Ang mga operatiba sang RJPC-BHB nagpatuman sang silot-kamatayon kay Lalong Barangay Kapitan Benjamin Havoc, 54 anyos, sa Sityo Lower, Barangay Lalong sadtong ika-26 sang Agosto mga alas kwatro sang aga.

Kadungan sini ang pag-reyd sa iya puluy-anan kung sa diin nakakumpiska ang RJPC-BHB sang isa ka ingram kag mga bala, cellular phone nga may numero sa nga aktibo nga elemento sang 79th IB-PA kag anum (6) ka hand-held radio.

Kilala si Havoc bilang tigprotektar sa mga transaksyon sang droga sa iya kag sa kaingod nga mga barangay. Nagkomiter man siya sa mga krimen kontra-pumuluyo kag sa rebolusyonaryo nga kahublagan bilang isa ka aktibo nga asset sang paniktik kag nagpundar sang network sang paniktik sa iya nga barangay.

Antes sini, si Renato Estrebillo, 43 anyos halin sa Sityo Huybesan, Barangay Marcelo, ang ginsilotan sa mga operatiba sang RJPC-BHB sadtong ika-12 sang Agosto mga alas singko sang aga.

Si Estrebillo ang nagapanugid sa mga naga-opereyt nga tropa sang 79th IB nga nagresulta sa pagpatarasak nga pagpalupok sa isa ka panimalay nga nagpilas sa duha (2) ka bata, nagtroma sa mga myembro sang pamilya kag arbitraryo nga pag-aresto sa isa ka sibilyan sadtong Hulyo 6, 2022 sa amo nga erya. KIlala man siya sa iya pagpangawat sang produkto sang uma kag kahayupan.

Sadtong ika-7 sang Agosto mga alas nwebe sang aga, ang operatiba sang RJPC-BHB ang nag-ambus kay Rodel Nobleza, 37 anyos, sa Sityo Kamao, Barangay Marcelo.

Si Nobleza ang isa sa mga responsable nga nagresulta sa matiplanganon nga reyd sang AFP kontra sa NPA sadtong Abril 2019 sa amo nga erya nga nangin martir sanday Ka Yenyen, Ka Zero kag isa ka sibilyan. kilala man siya sa iya mga krimen kontra pumuluyo, pareho sang pagduso sang droga sa iya nga barangay kag mga kaingod nga lugar.

Sa piyak bahin, ang RJPC-BHB nagpatuman man sang madamo nga desisyon sang pagpaandam kag pagpahalin sa mga kriminal kag kontra-rebolusyonaryo sa sulod sa iya erya sang operasyon.

Ang mga krimen nga ginsang-at sa korte sang pumuluyo nag-agi sa maid-id nga imbistigasyon kag pagpamatbat. Ang RJPC-BHB naga-rebyu sang mga kaso antes ini ginpatuman.

Pasulit-sulit nga ginpanginwala sa AFP ang kaangtanan sa mga kriminal nga ara sa sulod sa ila network sang paniktik, pero, ang reaksyon sang AFP nagatudlo sa piyak direksyon. Ang mga pasista (kag desperado) nga 79th IB, ang nagkondukta sang batalyon gidak-on nga operasyon sang militar sa bukiron nga bahin sang Calatrava pagkatapos gid lamang masilotan si Javoc.

Nagpaandam man ang RJPC-BHB sa mga KRME nga untaton na ang inyo makahuluya nga aktibidad antes kamo maka-komiter sang indi mapasaylo nga mga krimen kontra sa pumuluyo kag sa rebolusyonaryo nga kahublagan, pareho kay Havoc, Estrebillo kag Nobleza.

Pursigido ang RJPC-BHB sa paghatag hustisya sa mga biktima sa KRME.

Ang pumuluyo sa norte nga bahin sang Negros, hilabi na ang mga biktima sang mga gintumod nga KRME, kag ang bilog rebolusyonaryo nga kahublagan ang nagaselebrar sa kamatayon sa mga nagserbe sang mga pasista kag reaksyunaryo nga gubyerno.