Isa ka desperado nga tikang ang ginahimo sang teroristang berdugo militar nga uhaw sa dugo, ang pwersahan nga paggamit sa nga dating rebelde ukon mga surenderees bilang kabahin sa ila mahigko, mapintas kag kontra pomuluyo nga kampanya kontra sa rebolusyonaryong armadong paghimakas.

Ginpamatud-an na, sa malawig nga kasaysayan nga indi sini masarangan nga mapapas ang isa ka lihitimo/matuod-tuod, padayon ginasakdag kag lubos nga ginapalangga nga Bagong Hukbong Bayan ukon New Peoples Army. Ini bangod sa pagkamatarong sang kawsa nga ginapakig-away sini para sa mayorya sang pumuloyo nga nagabakho nga mga mangunguma kag mga mamumugon sa pag-antus sa malawig nga kapigusan, kaimulon, gutom, kawad-on kag kakulang sang pangabuhian, kawad-on kag kakulang sa serbisyo pangkatilingban, inhustisya kag kapabayaan sang reaksyunaryong gobyerno. Labi na gid sa handom sini nga pungsudnon nga demokrasya, matuod-tuod nga hustisya kag matarong nga kalinongan.

Tanan nga ini, nahibaluan kag naintindihan kag padayon nga ginapatihan hantop sa ila balatyagon sang mga nakaagi pultaym sa New Peoples Army, kag bisan sa bahin sang mga pwersa sang teroristang militar kag kapulisan ukon bisan sa bahin sang pila ka opisyal sang reaksyunaryong gobyerno. Pamatuod sini ang ila sekreto apang padayon nga pagsuporta sa Rebolusyonaryong Armadong Paghimakas sa pihak sang pamahog nga ginapatuman sang mga masupog nga opisyal sang teroristang militar, NTF-Elcac kag sang rehimeng US-Marcos Jr. kag ginpasad nga kontra pumuloyo nga patakaran nga kampanya militar nga Oplan Kapanatagan kag Anti-Terorism Law.

Ang ginahimo nga pagpresyur, pagsaywar, pagtan-ay sang kwarta kag pag-pasalig sini sang kuno kahilwayan sa anuman nga kaso nga posible ipasaka sa sin-o man nga natiplang nila, madakop ukon nagsurender nga rebelde isa lamang ka itsura sang pag-ako sang AFP-PNP kag sang reaksyonaryong gobyerno sa ila kahuy-anan kag kapaslawan.

Pamatuod sang pinakadaku nga kapaslawan sini ang tuba nga plaka nga pasulit-sulit nga deklarasyon kag wala katapusan nga ekstensyon sang ila taning sang panahon ukon pat-ud nga natalana nga petsa kada tuig kag ang pinakaulihi ang pagpamilit sini nga asta na lang sa katapusan nga bulan sang Disyembre sini nga tuig 2024 maubos pulbos na ukon wala na sang may mabilin nga NPA sa isla sang Panay.

Gani, kami sa rebolusyonaryong armadong kahublagan, sa ngalan sg kapaskwahan sini nga bulan sang Disyembre hugot nga nagapanawagan sang mga dating rebelde ukon mga ex-NPA nga mangin muklat kag indi magpahaylo sa anuman nga promisa sg militar nga hilwayon kamu kabaylo sang inyo mahatag nga impormasyon sa ila, piliton nga gamiton kamu nga maghambal sang kontra sa inyo balatyagon kag ginapatihan nga kawsa, himuon kamu nga instrumento sa ila maitom nga propaganda kontra hublag kag mangin kabahin kamu sa ila iskripted nga pagpakalain sa hublag kag pila ka indibidwal nga kaupod, paggamit sa inyo bilang mga lokal aset ukon intel militar, piliton kamo nga itudlo ang inyo mga dati nga kaupod, ipatudlo ukon ipahingadlan sa inyo ang mga masa nga naggasuporta sa npa, ukon gamiton kamu nga spotter sa mga mayor nga lugar sang mga banwa-banwa kag ang pinakalala ang pwersahan nga pag-paupod sa mga kombat nga operasyon nga nagabutang sa inyo sa dugang nga katalagman kag pagbuyo nga makakomiter sang kahalitan sa masang pumuluyo nga nagpalangga kag nagsuporta sa inyo kag sa dati nyo nga mga nangin kaupod sa kabuhi kamatayon nga paghimakas.

Samtang temprano pa magtinguha nga manginpadlos sa kamot sg matuod-tuod nga terorista, kriminal, berdugo nga AFP, PNP kag NTF-Elcac!

Untaton nyo na ang anuman nga porma sang pagpakighimbon nga magaduso sa inyo nga magtraidor sa pumuluyo kag sa hublag. Wala sang anuman nga maayo nga maidul-ong ang padayon nga pagpagamit ninyo sa militar para sa inyo kaugalingong kundi ang ibuyo kamu sa kalainan, pagtuga sang dugang nga kahalitan sa masa nga dati nagrisgo kag nagpalangga sa inyo, pagkomiter sang posible krimen sa pumuluyo kag sa hublag kag ang pinakamalaw-ay sa tanan kon mabantogan nga nagtraidor, isuka na kamo sang militar kon tapos na ila kinahanglan sa inyo, madula ang respeto kag pagsalig sa inyo sang inyo mismo pamilya kag sang mga masa, kag ukon asta kamo madulaan man sang respeto kag pagsalig sa inyo kaugalingon. Labaw sa tanan indi nyo na paghulaton pa nga mag-itom ang inyo konsensya kag mamantsahan pa sang dugo ang inyo mga kamot.

Indi nyo pagkalimtan nga sa sin-o man nga indibidwal nga nakalapas sang mga malala nga pagsayop kag nakakomiter sang anuman nga krimen batok sa pumuluyo kag sa rebolusyonaryong kahublagan, ara pirme ang Hukmanan sang Banwa nga magabista kag magahusgar sa inyo. Gani, samtang temprano pa, pinakamaayo nga mag-untat na kamo, magtinguha nga magbag-o, mangita sang desenti nga trabaho kag mangabuhi sang matarong kag malinong nga wala sang ginapangalag-agan. Bangud, anuman oras kag sa diin man nga lugar ang pagpatuman sang malaba nga kamot sang Rebolusyonaryong Hustisya ang magalagas kag magalab-ot gid inyo.

Magtinguha nga magbag-o subong nga kapaskwahan!
Padayon nga Alagaran ang Pumuluyo!