Ginpasingki sang pasistang 62nd IB upod sa mga traidor sa rebolusyon kag masa sa Central nga bahin sang isla. Wala-puas ang pagperwisyo sang berdugong militar sa tawhanon nga kinamatarung kag seguridad sang mga pumuluyo samtang nagaantus sila, ilabi na ang mga mangunguma, sa grabe nga kapigaduhon bunga sang kawad-on sa duta kag pangabuhian nga gintuga sang lapnagon nga pagpang-agaw sang duta dulot sang neoliberal nga pagpang-atake sang makidumuluong nga patakaran sa industriya sang kalamay kag iban pa nga porma sang pyudal kag malapyudal nga pagpanghimulos.

Enero 19—liwat naman nga ginlusob sang 62nd IB ang komunidad sang mga mangunguma kag mamumugon sa kampo sa banwa sang La Castellana, Negros Occidental. Ginsulod sang anum ka tropa militar upod ang traidor sa rebolusyon nga si Renante Mission @Karding/Tibor/Eman ang puluy-an ni Japar Lascano kag Dino Demerin, lunsay mga mangunguma, may asawa kag kabataan sang Sityo Mandayao 4, Barangay Mansalanao.

Si Lascano kag Demerin, ginpasibangdan nga mga katapo sang NPA kag gin pangitaan sang militar sang duha ka M16 rifle. Ginpahug pa sila sang militar nga kon indi magsugid, ipatawag sila liwat sang militar, pagakasuhan kag ipapriso. Bngud sini, dako ang pagkabalaka sang pamilya Lascano kag Demerin subongman sang mga residente sa lugar.

Kadungan sini, ginpatawag man sang pasistang 62nd IB upod gihapon sila Mission kag Omboy, ang mga residente nga ginaduha-duhaan nga mga supporter sang NPA sa Sityo Bulakaw, Barangay Binubuhan, Guihulngan City, Negros Oriental. Tuyo sang militar nga pasurenderon ang mga inosenteng sibilyan sa nasambit nga lugar.

Enero 20—paagi gihapon sa mga traidor sa rebolusyon nga sila Mission kag Omboy, pilit man nga ginpatawag kag ginpahug sang 62nd IB si Coco Quinanola, Wiwin Quinanola, Boboy Periolo kag Lean Castella, tanan sang Sityo Tiyos, Barangay Quintin Remo, Moises Padilla, Negros Occidental agud pasurenderon sa militar.

Tuyo sang 62nd IB nga kwartahon ang pumuluyo sa Central Negros paagi sa peke nga iskema sa pagpasurender kag gatasan nga E-CLIP sang mga matag-as nga opisyal sang AFP sang mapintas kag reaksyonaryong estado.

Si Renante Mission @Karding/Tibor/Eman kag Renalyn Omboy @Mulan/Dayna ang may salabton nga kaso sang pagpangawat kag utang nga dugo sa rebolusyonaryong korte sang pumuluyo. Sila ang direkta man nga ginauyatan ni @Kyle nga regular intel officer sang Armed Forces of the Philippines nga nagahulag sa Central Negros.

Samtang may mga presensya kag kolum sang militar sadtong Enero 22 sa mga sityo sang Upper Natae, Nabuluan, Gibawan kag proper sang Barangay Bucalan; sa Sityo Palaming, Barangay Binalbagan kag may tropa militar man sa Barangay Panubigan; tanan sang Canlaon City, Negros Oriental.

Nagatiner man ang militar sa barangay hall sang Barangay Macagahay, Moises Padilla.