Kalpasan a nagsagaba manipud iti kaswalti kadagiti serye ti taktikal nga opensiba nga insayangkat ti NPA kadakuada idiay Bauko ken Tadian, Mt. Province idi Marso 29, Marso 31 ken Abril 2, ti AFP ken PNP ket agipaspasaknap iti midya ken publiko ti psywar tapno allilawen ken butbutngen ti umili.

Ti awan sarday ken napeklan a kinaulbod ken kampanya ti pammadakes ti AFP ken PNP kontra iti NPA ket nagsiwarak kadagiti lokal ken nasyunal a diaryo, iti radyo, TV ken internet. Dagitoy ket desperado nga addang tapno kaluban ti pannakaibabain da, guyoden ti simpatiya ti umili kadagiti pannakaabak da ken tapno pagtalnaen ti rebolusyonaryo a dangadang ti umili iti nailian a pannakaidadanes ken para iti bukod da a panggeddeng ken demokrasya.

Ipanpannakkel ti PNP Provincial Director ti Mt. Province a napatignay da dagiti lokal a gobyerno ken umili ti Tadian ken Bauko idi Abril 9 ken 10 kadagiti “peace” rally a mangkonkondenar iti “kinadangkes” ti NPA ken mangidekdeklara kadagitoy a persona non grata wenno agbasakbasak a tattao a laklaksiden ti umili. Siasino ngata ti pudno a persona non grata?

Nu siasino ti rumbeng a maideklara a persona non grata ket ti AFP, PNP kenDENR. Isuda ti agbasakbasak kadagiti ansestral a teritoryo ti nailian a minorya, tapno maiserbi dagitoy kadagiti bukatot a kapitalista a minasan, kumpanya ti enerhiya ken dadakkel a logger. Ti AFP ti puersado a mangok-okupar ken agkamkampo kadagiti komunidad tapno ranggasan ken allilawen ti umili. Ti pammabasol da a “natrauma” dagiti komunidad ti Mt. Province kalpasan dagitoy a taktikal nga opensiba ti NPA ket agtataud iti brutalidad ti AFP ken PNP. Puerpuersaen da dagiti sibilyan nga agsurender kas rebelde, laplapdan ti nawaya a panaggaraw da iti inaldaw-aldaw, agparparbo kadagiti kaskaso dagiti inosente a sibilyan, laplapdan ti iseserrek ti suplay a taraon da, bombombaen dagiti komunidad ken usok, kumkumpiskaren dagiti chainsaw, tabla ken armas da a panganup. Kalpasan dagiti labanan, nagharas ti Phil Army ken PNP ti sumagmamano nga umili ti Tadian ken Bauko, ken inakusaran dagitoy a kameng ti NPA.

Iti likod dagitoy nga inuulbod, balligi a naipatungpal ti NPA dagiti agasasaruno nga addang pannusa kadagiti pasista a tropa gapu iti dakkel a suporta ti umili iti Mt. Province. Idi Marso 29, Marso 31 ken Abril 2, epektibo a pinaay ti NPA ti nagkumbina nga operasyon kombat ti Phil Army ken PNP tapno puersaen ti umili iti Mt. Province nga isardeng ti babassit a panagragadi ken panag-usok da. Loklokuen da laeng ti publiko iti panangipasindayag nga idekdeklara ti umili a “persona non grata” ti NPA, idinto nga ti NPA ti pagsangsanggiran ti umili iti laban da kadagiti manangidadanes a patakaran ti reaksyunaryo a gobyerno a mangipapaidam ken mangag-agaw kadagiti ansestral a dagdaga da ken mangbadbaddek iti karbengan da iti bukod a pangngeddeng.

Iti panangipasaknap iti midya kadagiti malisyoso nga intriga kas iti panangrugit ti NPA iti danum ti Tadian ken Bauko, ken panangpuor kadagiti kabakiran, ipaspasa laeng ti pasista a pulisya ken militar ti dugyot da kadagiti Soldados ti Umili. Kadagiti operasyon da iti nadumaduma a paset ti Cordillera, ti Phil Army ti mangrugrigit kadagiti danum ken mangiwarwara kadagiti rugit da ken mangbombomba ken mangpupuor kadagiti kabakiran. Istrikto a sursuroten ken ipatpatungpal ti NPA ti medikal a pagallagadan ken etika, disiplina iti salun-at ken sanitasyon kasta met ti panagsalaknib iti aglawlaw nga isursuro da iti masa. Ti pablaak iti midya ni PRO-Cor Director Israel Dickson nga inwara ti NPA dagiti medikal a rugit da ket mangrirriro laeng iti publiko gapu ta isuda met ti natayan ken nasugatan kadagiti nasao a labanan.

Iti panangipabpablaak ti PRO-Cor, Phil Army ken ti Regional Peace and Order Council (RPOC) ti Cordillera iti palso nga impormasyon a naglabsing ti NPA iti Rules of War ken International Humanitarian Law iti panangusar iti Improvised Explosive Devices, iramraman da laeng ti umili iti ignoransya da. Dagiti Command-Detonated Explosive Devices nga us-usaren ti NPA ket saan nga iparparit dagiti internasyunal a linteg ti gubat ken makatao a linteg. Iti panangiwaras kadagiti inuulbod a nakarekober da kadagiti explosibo ken dagiti selpon ti NPA, ken panangipabuya kadagiti tattao kadagiti bidyo ken ladawan dagiti Nalabbaga a mannakigubat, mangal-allilaw ken mangbutbuteng laeng dagiti pasista a tropa.

Bayat nga umadani ti eleksyon ti Mayo 2019, agputputar ti AFP kadagiti “nakaam-ames nga istorya” ken inuulbod tapno ikalintegan ti operasyon kombat ken presensya da kadagiti lugar nu sadinno a patpatibkeren dagiti agturay a pulitikal a partido dagiti posisyon da iti reaksyunaryo a gobyerno. Ipatpatungpal da ti panggep ti Rehimen US-Duterte a kontrolen daytoy nga eleksyon ken isigurado a dagiti kandidato ken pulitikal a partido na ti rumimbaw iti kasta ket agtuloy dagiti neoliberal a patakaran ken diktadura na. Ti alegasyon ti militar ken pulisya nga agkikkikil ti NPA kadagiti pulitiko ket rason da laeng nga agoperasyon kadagiti komunidad tapno maisayangkat da dagiti red-tagging wenno panangtatak kas “komunista” ken kampanya a pammadakes kadagiti progresibo ken maka-umili a kandidato ken partylist. Ita nga eleksyon ti Mayo 2019, ing-ingetan pay ti AFP ken PNP ti pananglapped iti demokratiko a tignayan ti umili a mangilaban kadagiti nailian demokratiko nga adyenda. Panggep ti AFP ken PNP a saan a makatugaw dagiti progresibo ken maka-umili a kandidato ken partylist iti Kongreso ken Senado.

Babaen ti National Task Force (NTF) To End Insurgency, ir-irutan ti AFP ken PNP ti Cordillera ti suporta ti RPOC, dagiti Local Government Units ken dadduma pay nga ahensya ti gobyerno ti Cordillera iti panangipatungpal iti ambisyoso a kampanya ti Rehimen US-Duterte Regime a punasen ti CPP-NPA ken ti rebolusyonaryo a tignayan, karaman ti ligal ken demokratiko a tignayan ti umili. Punpuntiryaen ti NTF dagiti dadaulo kadagiti ligal demokratiko nga organisasyon ti umili ken birbirngasan dagitoy kas “komunista a prente” tapno agbalin da a target ti terorista nga atake.

Agtagtagainep ti Rehimen US-Duterte ken dagiti aso-aso na nga AFP ken PNP iti Cordillera nu panpanunoten da a dagitoy a narugit a taktika ken maniobra da ket mangpasardeng iti dangadang ti umili. Iti kabaliktad na, sungsungrodan laeng dagitoy ti pungtot ti umili ken lalo nga idurdurduron ida iti armado a rebolusyon.

Gumilgil-ayab ti pakasaritaan ti umili nga Igorot iti rebolusyonaryo a panaglaban iti nailian a panangidadanes. Ti gandat ti reaksyunaryo nga armado a puersa nga iddepen daytoy babaen iti naparang a pasismo ken panangallilaw ket sigurado a mapaay.#