Nabulit sang dugo sang mga biktima ang organisasyon sang AFP kag Rehimeng US-Marcos II sa ila padayon kag hungod nga paglapas sang tawhanon nga kinamatarung sang pumuluyo kag sang mga rebolusyonaryong pwersa sa isla sang Panay. Subong nga tuig 2024, mas masingki kag mas malala ang ila atake sa kinamatarong sang mga sibilyan kag mga hors de combat.

Preska pa sa aton pamensaron ang madugo nga paglapas sa layi sang gyera sadtong Agosto 2024 nga nagpatay sa 11 ka NPA nga nalakipan nanday Vicente Hinojales, Concha Araneta-Bocala, Aurelio Bosque kag iban pa.

Nagdugang diri ang paglapas sang 12th IB sadtong Oktubre 31, 2024 sa ila pagpatay kay “Ka Benmar”. Suno sa mga nakaluwas sa engkwentro, buhi pa sang napalapitan sang militar si Ka Benmar kag nabatian pa nga nagmando ang opisyal sang militar nga higtan ini kag nagsinggit sa naga-atras nga NPA nga kuhaa upod nyo diri, kag nabatian ang hurahab sang biktima kag pagkatapos ang singgit sang army nga “advance happy new year” kadungan sang linupok kag pagkatapos nagsinggit sila nga kuhaa nyo patay nyo di.

Patay na sang nasapwan sang militar si Jyrel Katipunan alyas Ka Jason sadtong Disyembre 10 nga napatay sa engkwentro sang Disyembre 9 sa Barangay Tacayan, Tapaz, Capiz. Bisan patay na, ginpaulanan pa ini sang luthang sang mga militar rason sang dugang nga mga kasamahan sa lain-lain nga bahin sang lawas ni Ka Jason imbis nga isa lang ang iya samad. Nagapakita ini sang wala pag-respeto sa bangkay.

Ginpahug kag gin-punggan nga magwa sa balay si alyas Potong sang Barangay Tagayan, Tapaz, Capiz sadtong Disyembre 9 sang mga katapo sang 12tb IB antes sang engkwentro sa tunga sang NPA.

Halin Enero tubtob Nobyembre 2024, naaguman sang pumuluyo sa kamot sang AFP ang nanari-sari nga paglapas sang ila kinamatarung. Ang militarisasyon kag pag-okupar sang mga sentrong baryo kag pagbase sa mga pampubliko nga mga istruktura, blokeyo sang pagkaon paagi sa pag tsekpoynt kag pagbawal sa ila nga magpamakal sang bastante nga pagkaon kag kagamitan, pagpamahog, intimidasyon kag harassment paagi sa pagtaya pusil, pagpatawag sa ila sa talon kag pag-interogar, pagsulod sang ila mga balay kag kamalig kag pagbaluskay sang ila mga kagamitan, iligal nga pag-aresto, pagsamad sang ila talamnan kag pag-gabot sang iban pa nga pananum, pagkumpiskar sang ila selpon kag radio handset, pilit nga pagpasurender, pagpanganyon nga nagatuga sang grabe nga kahadlok, kugmat kag pagkawasak sang ila mga ulumhan kag talon nga palangayaman kag kuluhaan uway kag banban para sa ila palangitan-an.

Pilit naman nga ginapaupod bilang giya sa operasyon ang mga nadakpan kag nagsurender nga mga ex-NPA paagi sa lain-lain nga porma sang pamahug kag pagpang-ipit ukon pagpasaka sang kaso kung mamalibad nga mag kooperar sa militar.

Sa sobra nga desperasyon sang AFP nga papason ang NPA kag rebolusyonaryong kahublagan sa Panay, wala patugsiling ang ila pagpamintas kag paglapas sa kinamatarung bilang laragway sang ila kapaslawan kag kahuy-anan.

Pumuluyo batuan ang mapintas nga militar!
Sukton sang hustisya kag pabayaron ang berdugo nga AFP!
Mag-intra sa NPA!