Indi matuod kag peke ang mga nagsurender nga mga katapo sang NPA nga ginpresentar sang 303rd Infantry Brigade paagi ni BGen. Inocencio Pasaporte, 94th Infantry Battlion commanding officer LtC. Van Donald Almonte kag sang LGU sang Himamaylan City, Negros Occidental sadtong Setyembre 27, 2022.

Ginpabugal sang reaksyonaro nga gobyerno nga nakahatag sila sang P10,000 nga financial assistance kag P5,000 nga educational assistance para sa mga nag-“surrender”. Kaangay sa limos ang dugang nga pagpanagtag sang sang mga food packs, relief supplies, hygiene kits, sleeping kits, kitchen kits kag family kits. Apang ang ini nga programa pareho sang E-CLIP sa matuod nangin gatasan sang mga korap nga opisyal sa hanay sang AFP/PNP/NTF-ELCAC.

Ginapresentar ang mga fake surrenderees para i-highlight ang mga accomplishment sang militar kag pulis nga as usual scripted. Nagapagwa pa sang mga videos kag interviews sang mga pamilya sang ila ginadudahan nga katapo sang NPA kag ipapanawagan nga magsurender–syempre paagi sa pressure kag pagpamahug.

Sa una nga tan-aw, daw ikalipay gid sang kuno surrenderees ang ginhatag sang gobyerno sa ila. Ang pamangkot, kinahanglan pa bala mag-NPA para mahatagan sang benepisyo kag makakuha sang serbisyo sosyal halin sa reaksyonaryo nga gobyerno?

Ang lohika sang pagbato kag pagsulod sa NPA sang pumuluyo, indi lang sang mga Himamaylanon pati na sa bilog pungsod, bangud sa garuk nga sistema nga malakolonyal kag malapyudal nga ginaharian sang mga dalagku nga burgesya-kumprador, mahimuslanon nga dalagku nga agalon mayduta kag korap nga mga burukrata kapitalista nga ara sa poder idalom tanan sang paghari sang imperyalistang US. Ang ugat sang armado nga paghimakas sang pumuluyo amo ang kawad-on sang duta sang mayorya nga mangunguma, wala sang pungsodnon nga industriyalisasyon, kawad-on sang trabaho sa mayorya nga mamumugon, manubo nga sweldo, komersyalisado nga sistema sang edukasyon, implasyon, pasismo sang estado kag inhustisya sosyal.

Programa sang farm-to-market road? Sang water system kag electrical installation? Sa isa ka bahin magahatag ini sang gamay nga benipisyo sa pumuluyo sa kabukiran, pero ang mas mayor nga hambalanon ang pagpasulod sang mga proyekto para tagaan dalan ang makahalalit nga mina nga nagatarget sa mga bukid sa boundary sang Himamaylan sang Negros Occidental kag Tayasan sang Negros Oriental, ang engrande nga Ilog-Hilabangan River Basin Project (IHRBP) nga magahalit sang libuan ka pumuluyo sa masobra 20 ka banwa kag syudad, kag ang E-NGP sa mga ginakabig nga protected areas kag watershed areas. Ang wala untat nga militarisasyon sa kabukiran nga nagabiktima sa pumuluyo labina sa mga mangunguma ang nagaprotektar sa mga makahalalit nga proyekto kag nagapaseguro nga maghipos lang ang pumuluyo nga apektado.

Kon nagapati ang reaksyonaryo nga gobyerno kag ang AFP/PNP/NTF-ELCAC nga mapunggan nila ang pagbato sang pumuluyo ukon sa partikular ang armado nga paghimakas sang pumuluyo paagi sang paghatag mumho sa mga ginapresentar nila nga peke nga surrenderees, damgo ini sa ugtong adlaw!

Indi matapos ang armado nga paghimakas kon indi masabat ang ugat sang armado nga konplikto.

Dugang diri, balantayan ang nangin pahayag ni BGen. Pasaporte nga base sa ila rekord ara pa kuno sa Himamaylan City ang mayorya nga nabilin nga mga rebelde. Antisipahon nga mas magabaskog ang operasyon militar kag magadamo ang kalapasan sa tawhanon nga kinamatarung sa lugar. Kadungan sini posible pa ang lain naman nga peke nga presentasyon sang mga kuno surrenderees para sa ila nga korapsyon kag matiplangon nga propaganda.

Ginapanawagan sang MCC-NPA sa pumuluyo nga mangin militante kag indi magpadala sa mga matiplangon nga mga programa sang AFP-PNP/NTF-ELCAC nga tuyo punggan kag pahilumon ang pagbato sang sahing ginahimuslan. Wala na sang iban nga solusyon kundi ang armado nga rebolusyon.