Karuyag namon igpasabot ha publiko nga an grupo nga Uswag Sinirangan Bisayas usa nga peke nga NGO nga ginpapadalagan han mga ahente militar nga binaydan han 8th Infantry Division ngan National Task Force-Elcac. Gin-uundong nira an madarahug nga panmuypoy ha masa nga parag-uma subay ha kampanya nga kontra-insurhensiya han rehimen US-Marcos.

Nagseserbe nga executive director han nasering nga grupo hi Terencio “Anjo” Eder Jr. Hi Eder usa nga hadto anay kaapi han BHB nga linayas hadton katapusan han 2023 ngan nadakop han mga ahente han estado ha Baguio City hadton 2024. Sukwahi ha ginlalauman ha usa nga rebolusyunaryo nga manindugan ano man kakuri an detensyon, ha proseso gintalikuran ni Eder an iya mga prinsipyo ngan gintraydor an masa ngan an rebolusyon. Yana upud-upod na niya an iya igkasi traydor nga hira Alma “Joy” Gabin (nga ginpapamunuan an usa pa nga peke nga NGO nga Eastern Visayas Peace Builders Federation), Freddie “Dori” Bolito, ngan iba pa.

Labot ha 8th ID ngan NTF-Elcac, ginpopondohan liwat han imperyalismo nga US an operasyon han ira mga grupo. Nagseserbe hira Eder komo pikoy han pasista nga rehimen agud pakarauton ngan pamingawon an lehitimo nga paggios han katawhan han Eastern Visayas kontra korapsyon ngan panmuypoy. Instrumento hira han saywar ngan pwersahay nga pagpapasurender ha masa nga hadto nagmayuyo ha ira kundi ira ginlingo.

Nananawagan kami ha publiko nga igsalikway ngan ibuksas ini nga mga demonyo nga traydor. Diri hira matatapuran. Ginhihimo la nira nga gatasan han kurakot an ira mga peke nga NGO para ha kalugaringon nga kapulsanan.