Narubduban ti napalalo a pungtot ti umili a Pilipino iti kina-aso-aso ken traydor a panangited ni Duterte iti absolute pardon kenni US Marine Lance Cpl. Joseph Scott Pemberton.

Ni Pemberton ket maysa a rapist ken murderer. Ti inaramid na ket nadagsen a krimen a mangidadanes kadagiti LGBT ken krimen kontra iti umili a Pilipino. Nirames ken pinatay na ni Jennifer Laude idi October 2014, isu a naikkan ti dusa a 12 tawen iti pagbaludan. Naibalod isuna iti special facility ti US iti uneg ti Camp Aguinaldo, ken pinaababa iti 10 tawen ti dusa na. Tatta ket dagus pay a mawayawayaan ta inikkan met ti absolute pardon ni Duterte gapu kano iti Good Conduct Time Allowance.

Ti special treatment ken express lane nga inted ti aso-aso a gobyerno ti Pilipinas kenni Pemberton ket nakaramut iti Visiting Forces Agreement. Ti VFA ket nangited ti pribelihiyo kadagiti soldalo ken opisyales ti US iti Pilipinas bayat a badbaddekkan da ti soberanya ken karbengan ti umili a Pilipino. Dagiti bangking a tulagan ti gobyerno ken imperyalista ket agserbi para iti pangekonomiya nga interes ken panag-gamrod da iti nabatbati a kinabaknang ti Pilipinas, agraman iti Montanyosa.Ti traydor nga aramid ni Duterte ket pakakitaan ti kina-aso-aso na iti imperyalista nga US. Makitan a ti ikarkari ni Duterte nga ikkaten ti VFA ket pamarang a panagpangta laeng tapno maisigurado ti suporta ti US iti pasista a panagturay na, ken manayunan pay ti pangmilitar nga ayuda iti kontra-umili a gubat nga isaysayangkat na. Saan a takderan ni Duterte ti soberanya ti pagilian, ken pulos nga awan biyang na iti karbengan ti umili a Pilipino.

Babaen iti protesta ken naiurot a panagsipot ti umili, naiduron ti gobyerno nga makasoan ken maibalud ni Pemberton, maysa nga addang tapnno maikkan ti hustisya ni Jennifer. Kasapulan nga ipinget ti karbengan ti umili a Pilipino iti sango ti aso-aso ken pasista a turay. Rumbeng a saan nga agsarday iti kolektibo a panagtignay ti patriyotiko nga umili, karaman dagiti LGBT, tapno maikkat ti VFA ken amin a bangking a tungtungan iti US.

Iti panangiyabante ti konta-imperyalismo a panakidangang laeng a masigurado a maikkan ti hustisya ni Jennifer Laude ken umili a Pilipino. Iti panagballigi ti demokratiko a rebolusyon ti umili a mapunas ti panangidadanes ti imperyalista nga US ken magun-od ti pudno a nalian a wayawaya.

Gun-oden ti hustisya para kenni Jennifer Laude ken umili a Pilipino! Ibasura ti VFA! Iyabante ti nailian demokratiko a gubat ti umili! #ResistTheFascist #OustDuterte