Ara naman ang tropa sang berdugo kag pasistang 62nd IBPA sa Barangay Amontay banwa sang Binalbagan; Brgy Aguntilang-3, Isabela, Negros Occidental; kag Brgy Talaon, La Libertad, Negros Oriental.

Nobyembre 15, 2022 alas 7:00 sang gab-i nag-abot ang 20 ka tropa sang berdugong 62nd IB sa barangay proper. Tubtob karun nga adlaw Nobyembre 16. Ginhimo sang nasambit nga tropa ang Brgy Hall sang Brgy Amontay, Binalbagan nga kampo militar. Nahadlok ang mga pumuluyo magpalapit sa Brgy Hall ilabe na ang may mga transaksyon subong nga adlaw sa nasambit nga baryo bangud sang presensya sang militar. Rason sang mga pumuluyo bangud madata ang pagpangkastigo sa mga sibilyan sang nasambit nga militar sa kasikbit sini nga baryo kaangay sa natabo kay Tonie Elod sang sityo Mabato, Brgy Talaon, La Libertad. Ginpasibangdan nga katapo sang yunit milisya sang NPA. Gintamnan sang armas kag iligal nga gin-aresto. Tubtob subong ara pa sa prisohan bangud sang himu-himo nga kaso.

Nobyembre 15, 2022 liwat naman nga ginteniran sang 22 ka elemento sang 62nd IB ang balay ni Tonie Elod sa sityo Mabato, Brgy Talaon, La Libertad. Wala na nagatulog ang pamilya Elod sa ila puluy-an kag halos na indi magpalapit ang nasambit nga pamilya bangud sang kahadlok. Naperwisyo ang pamilya sa ila pangabuhi bangud sang presensya sang militar sa ila puluy-an. Tubtob subong Nobyembre 16 ara pa ang pasistang militar sa ila puluy-an.

Nobyembre 16, 2022 nagtiner man ang 1 ka platun sang 62nd IB sa balay ni Jerry Cancelo sang sityo Camandagan, Brgy Aguntilang-3, Isabela, Negros Occidental. Nakugmat man ang pamilya bangud ginahimo lamang sila sang militar nga human shields batok sa ila kontra.

Ang 14 ka adlaw (sugod November 2-November 16, 2022) nga operasyon militar sa tri-bounday sang Binalbagan, Isabela kag La Libertad, pagtiner sa mga puluy-an sang mga mangunguma, eskwelahan kag Brgy Hall nagperwisyo sa pumuluyo. Subong man muklat nga paglapas sang 62nd IB sa mga kasugtanan sa CARHRIHL.